Mámleketimiz basshısınıń 2022-jıl 21-fevraldaǵı «Jer uchastkalarınan paydalanıwda mámleketlik qadaǵalawdıń nátiyjeligigin arttırıw ilajları haqqında»ǵı qararınıń orınlanıwı boyınsha Qaraqalpaqstan Respublikası prokurorı E.Tadjievtiń basshılıǵında májilis ótkerildi.
Onda jer resurslarınan aqılǵa uǵras paydalanıwdı támiyinlew baǵdarında dúzilgen jumısshı topar aǵzaları, Qaraqalpaqstan Respublikası qurılıs ministrligi, Kadastr agentligi, Kadastr palatasınıń aymaqlıq basqarması hám basqa juwapker shólkemlerdiń wákilleri qatnastı.
Atap ótilgenindey, sońǵı jılları respublikada jer uchastkalarınan aqılǵa uǵras hám maqsetli paydalanıwın támiyinlew, olardı qorǵaw, jańa jerlerdi ózlestiriw hám qayta aylanısqa kirgiziw baǵdarında sistemalı jumıslar ámelge asırılmaqta. Biraq, ayırım aymaqlarda jer nızamshılıǵına ámel etpew, jer uchastkalarınan maqsetsiz hám nátiyjesiz paydalanıw, nızamsız qurılmalar qurıw, jerlerdi ózbasımshalıq penen iyelew jaǵdayları ushıraspaqta.
Májiliste qarardıń orınlanıwın támiyinlew, jer resurslarınıń talan-tarajlıǵı, ózbasımshalıq penen iyelew jaǵdaylarınıń aldın alıwǵa qaratılǵan jumıslar sın kózqarasta dodalandı. Jol qoyılıp atırǵan kemshiliklerdi saplastırıw, keleshekte wazıypalardı nátiyjeli ámelge asırıw baǵdarında ilajlar belgilenip, bul boyınsha taraw juwapkerlerine tapsırmalar berildi.
Qaraqalpaqstan xabar agentligi