Shabandoz, at belinde shabandoz,
Arǵımaǵı astında, bárinen oz shabandoz,-dep esitken adamǵa milliy súyispenshilikti arttırıp, kókiregińdi maqtanısh sezimine toltıratuǵın qosıq jaqında sociallıq tarmaqlar arqalı jıldırımday tarqalıp, yutubta eki ayda 16 mıńnan aslam kórilgen. Bul qosıqtı Ózbekstan mámleketlik kórkem óner hám mádeniyat institutı Nókis filialı baqsıshılıq hám dástanshılıq qánigeliginiń 3-kurs studenti Mehriban Tilewmuratova atqarıp, tıńlawshılar tárepinen jaqsı kútip alınbaqta.

Qanlıkól rayonınıń Jayxun APJ da tuwılıp ósken Mehriban balalıǵınan kórkem ónerge qızıǵıwshılıǵı joqarı bolǵan. Lekin, shańaraq aǵzalarınıń qarsılıǵı sebepli ol kórkem ónerge kesh bolsa da kirip keledi. Yaǵnıy, mektepte 11-klassta oqıp júrgen gezlerinde qaraqalpaq xalqınıń milliy ala moynaq duwtarın shertip úyrene baslaydı. Duwtar shertiwdiń álwan túrli sırların úyretip, baqsıshılıq ónerine qızıǵıwına sebepshi bolǵan ustazı, paytaxtımızdaǵı 12-sanlı balalar muzıka mektebiniń oqıtıwshısı Sapargúl Basherova onıń aydın keleshegine jol salǵan birinshi ustazı. Házirgi waqıtta Qaraqalpaqstan xalıq baqsısı Gúlbaxar Aqımbetova onıń talantın qollap-quwatlap, hár tárepleme járdem berip kelmekte.
Ol qaraqalpaq xalıq qosıqları menen dástanlardan úzindiler atqarıp bir neshe tańlawlarda aldınǵı orınlarǵa miyasar bolıp kelmekte. Atap aytqanda, 2023-jılı «Esjan baqsı urpaqları» tańlawınıń respublikalıq basqıshında sertifikat penen sıylıqlanǵan bolsa, Qazaqstanda ótkerilgen Drii fest xalıqaralıq festivalında qatnasıp gran pri sıylıǵına múnásip bolǵan bolsa, 2024-jılı Rossiya mámleketinde ótkerilgen «Sedmoy zima» tańlawında onlayn usılda qatnasıp sıylı birinshi orındı hám «Sanat sexri» tańlawında birinshi orındı iyelewge miyasar boladı.
Mehriban qosıq aytıw menen birge oqıw ornında sabaqlarınan jaqsı bahalarǵa úlgeriwi menen kózge túsip, Ibrayım Yusupov atındaǵı mámleketlik stipendiyası iyesi boldı.
-Házirgi waqıtta ustazım Gúlbahar Aqımbetova menen jańa qosıqlar ústinde islep atırmız. Keleshekte xalqımızdıń kewlinen shıǵatuǵınday milliy qosıqlardı, dástanlardı atqarıp, Zulfiya atındaǵı mámleketlik sıylıqtıń iyesi bolsam degen niyettemen,-deydi Mehriban.

Elimizde Nawrız quwanıshları dawam etip, orınlarda ótkerilip atırǵan bayram tamashalarında kórkem-óner ǵayratkerleri ózleriniń koncert baǵdarlamaları menen xalqımızǵa kóterińki keypiyat baǵıshlamaqta. Mehriban da paytaxtımızda bolıp ótken Nawrız bayramına baǵıshlanǵan koncert baǵdarlamasında «Shabandoz» qosıǵın atqarıp tamashagóylerdiń alǵısına miyasar boldı.

Dástanlar atqarıwdı niyet etip, tınımsız tayarlıqlar menen bánt bolıp atırǵan jas baqsı qızımızdıń keleshegi aydın bolıwın tileymiz.

G.Turdıshova, Qaraqalpaqstan xabar agentligi