Mámleketimizde puqaralardıń jumıs penen bántligin támiyinlew hám turmıs sharayatların jaqsılaw maqsetinde, shańaraq isbilermenligin rawajlandırıw boyınsha bankler tárepinen máhálle jetiliginiń usınısı tiykarında, jeńillikli kreditler ajıratılıwı jolǵa qoyılǵan. Bul jeńilliklerden durıs paydalanǵan halda óziniń turmıs sharayatların jaqsılawǵa erisken, kredit tiykarında jolǵa qoyǵan isbilermenligi arqasında tapqan paydası yaki ónimlerin óz shańaraǵı, shańaraǵınan awısqanların bazarlarǵa shıǵarıp dáramat tawıp kiyatırǵan puqaralar kópshilikti quraydı.

Degen menen, aramızda óz xızmet wazıypalarına juwapkershiliksiz qarap, óz mápin xalıq mápinen ústin qoyıp júrgen zamanlaslarımızda barlıǵı bizlerdi tereń oyǵa taldıradı.
Bunı bizler Jınayat isleri boyınsha Taxtakópir rayon sudında kórilgen is mısalında kóriwimiz múmkin.
Sud majilisinde anıqlanǵan jaǵdaylarǵa bola, Taxtakópir rayonı Múlk APJ nıń hayal-qızlar máseleleri boyınsha másláhátshisi Z.Q jınayıy sherigi usı aymaqtaǵı hákim járdemshisi B.M menen til biriktirip Taxtakópir rayonı Múlk APJ Jılǵalı kóshesi 1-jayda jasawshı puqara G.P nıń atına Taxtakópir rayonlıq mámleketlik xızmetler orayınan elektron sanlı qoltańba ashtıradı hám usı elektron qoltańbadan P.Gnıń xabarısız 2023-jıldıń 9-iyun kúni AK «Xalıq bank»tiń Taxtakópir rayonlıq filialına «hár bir shańaraq isbilermen» baǵdarlaması tiykarında 36 ay múddetke 6 ay jeńillikli dáwir hám jıllıq 14% ústeme haqı tólew shárti menen mototransport quralın satıp alıw ushın 32.500.000 sum muǵdarında kredit ajıratıw haqqında arza jazadı. Bul arzada kórsetiliwi lazım bolǵan telefon nomer grafasına tanısı J.Bǵa tiyisli telefon nomerin kórsetip, puqara P.Gnıń atına qálbeki arza menen múrájat etip, jábirleniwshiniń atınan 32.500.000 sum kredit pulların ajıratılıwına erisken.
Álbette, «qıńır istiń qıyıǵı qırıq jıldan keyin de shıǵadı» degendey bul puqaralardıń nızamsız is-háreketleri óz waqtında ashılıp, sud májilisinde nızam aldında juwapkershilik máseleleri kórip shıǵıldı.
Degen menen jaza tayınlaw menen máseleniń sheshimi tabıldı dep bolmaydı. Shańaraqlardıń abadan turmıs keshiriwi hám keleshekke isenim menen qarawı ushın mámleketimiz tárepinen jaratılǵan keń imkaniyatlardan durıs paydalanıwın támiyinlewde mámleketlik uyım xızmetkerleri óz xızmet wazıypalarına hadal hám pidayı bolıwı, korrupciya illetinen awlaq bolıwı zarúr.

O. Maulenov,
Jınayat isleri boyınsha
Taxtakópir rayonlıq sudınıń baslıǵı.
Qaraqalpaqstan xabar agentligi.