Respublikalıq mákemeler aralıq jumısshı topardıń Beruniy, Tórtkúl, Kegeyli, Nókis rayonları hám Nókis qalasındaǵı úyreniwleriniń juwmaqları, korrupciyaǵa baylanıslı jınayatshılıq jaǵdayı, kelip shıǵıw sebepleri hám olardı saplastırıw boyınsha kórilip atırǵan profilaktikalıq ilajlar aymaqlıq keńestiń májilisinde dodalandı.

Májiliske Qaraqalpaqstan Respublikası Joqarǵı Keńesiniń Baslıǵı Amanbay Orınbaev qatnastı.
– Úsh kún dawamında densawlıqtı saqlaw, bántlik, mektepke shekemgi hám mektep bilimlendiriwi, kadastr-qurılıs tarawlarında 20 dan aslam obekt hám máhállelerde úyreniwler ótkerdik. Úyreniwlerimiz dawamında bul tarawlarda korrupciyanıń aldın alıw baǵdarında ayırım jumıslar nátiyjeli shólkemlestirilmegenligi hám xalıqqa mámleketlik xızmetlerdi kórsetiw processlerinde «insan faktorı» elege shekem saqlanıp qalıp atırǵanlıǵı anıqlandı. Sol sebepli, aldımızda korrupciyaǵa qarsı gúresiw sistemasın túp-tiykarınan qayta kórip shıǵıw, bul baǵdarda ásirese, aymaqlıq Keńestiń belsendiligin arttırıw, onıń aǵzalarınıń juwapkershiligin kúsheytiw boyınsha keshiktirip bolmaytuǵın wazıypalar tur, – dedi Korrupciyaǵa qarsı gúresiw agentligi direktorı Akmal Burxanov.
Májiliste úyreniw juwmaqları boyınsha rayon-qala hákimleri, huqıq qorǵaw uyımlarınıń basshıları hám basqa da tiyisli juwapkerler menen korrupciyalıq faktorlardı saplastırıw hám korrupciyalıq jınayatlardı keskin azaytıwǵa qaratılǵan ilajlar dodalandı.
Mámleketimiz basshısı tárepinen belgilep berilgen wazıypa hám tapsırmalardan kelip shıǵıp, Korrupciyaǵa qarsı gúresiw aymaqlıq keńesi hár ayda bir márte tańlap alınǵan taraw boyınsha korrupciyalıq faktorlardı úyreniw, usınıslar beriw hám usı taraw basshılarınıń málimlemelerin tıńlaw zárúr ekenligi atap ótildi.
Májiliste Tórtkúl rayonın korrupciyadan awlaq aymaqqa aylandırıw boyınsha ilajlar rejesin islep shıǵıw belgilendi.
Sonday-aq, Aymaqlıq keńestiń jańalanǵan jıllıq jumıs rejesi tastıyıqlandı.

Qaraqalpaqstan xabar agentligi