Prezidentimizdiń tapsırmalarına muwapıq xalqımızdıń keńpeyilligi hám qollap-quwatlaw belgisi sıpatında Nawrız ulıwma xalıqlıq bayramı hám jaqınlasıp kiyatırǵan Ramazan hayıtı múnásibeti menen derlik 200 tonna azıq-awqat ónimi artılǵan gezektegi gumanitarlıq járdemi Awǵanstan xalqına – qońsı mámlekettiń Balx wálayatına jetkerildi.

Gumanitarlıq járdem quramınan orın alǵan un, biyday, makaron, ósimlik mayı, qumsheker, tez tayarlanatuǵın taǵamlar, qızıl lobiya, másh ónimleri Hayraton qalasındaǵı «Astras» kompaniyası aymaǵında Prezidentimizdiń Awǵanstan boyınsha arnawlı wákili Ismatilla Irgashev, Surxandárya wálayatı hákimi Uluǵbek Qosimov, sonday-aq, Qorǵanıw, Transport, Qurılıs hám turaq jay kommunallıq xojalıǵı, Sırtqı isler ministrlikleriniń juwapkerleri, Balx wálayatı gubernatorı Muhammed Yusuf Vafo hám eki táreptiń basqa rásmiyleriniń qatnasıwında tapsırıldı.
Mozori Sharif qalasında eki tárepleme ushırasıw ótkerilip, keleshekte óz-ara birge islesiw baylanısların rawajlandırıw máseleleri dodalandı. Ámelge asırılıp atırǵan jańa joybarlar menen de tanısıldı.
Sóylesiw waqtında Ózbekstan tárepinen Awǵanstanda qurılıp atırǵan Imam Buxariy maqbarasınıń qurılısı haqqında da ayrıqsha pikir alısıldı.
Jan qońsı mámleket rásmiyleri Ózbekstan Prezidenti hám xalqına kórsetilip atırǵan járdemi ushın minnetdarshılıq bildirip, jaqınlasıp kiyatırǵan Ramazan hayıtı múnásibeti menen qızǵın qutlıqlawların jolladı.

Xolmwmin Mamatrayimov, ÓzAnıń xabarshısı