Nawrız – xalqımızdıń eski tariyxı, bay mádeniyatı hám biybaha qádiriyatların ózinde jámlegen tınıshlıq, tatıwlıq hám abadanlıq bayramı. Ol elimizde jasap atırǵan barlıq milletler, xalıqlar ushın birdey súyikli hám eń qádirli bayramlarınıń biri.

Respublikamızdıń barlıq aymaqlarında bolǵanı sıyaqlı, Taxtakópir rayonında bıyılǵı Nawrız ulıwmaxalıqlıq bayramı «Qádiriyatlarıń máńgi bolsın, Nawrız!» súreni astında kóterińki ruwxta ótkerildi.
Bayram saltanatında rayon hákiminiń birinshi orınbasarı T.Toqımbetov hám Qaraqalpaqstan Respublikası Joqarǵı Keńesiniń komitet baslıǵı M.Atamuratovlar rayon xalqın jasarıw hám jańalanıw, jaqsılıq hám keńpeyililik áyyyamı bolǵan – Nawrız ulıwmaxalıqlıq bayramı menen qızǵın qutlıqladı.
Sońınan respublikamızǵa belgili qosıqshılar hám rayonlıq mádeniyat bólimi xızmetkerleri tárepinen bayramǵa baǵıshlanǵan koncert baǵdarlaması qoyıp berilip, bul ilaj qatnasıwshılarına ayrıqsha zawıq baǵıshladı.
Xalıq seyiline aylanǵan Nawrız bayramında rayondaǵı mákeme, kárxana hám shólkem xızmetkerleri, aymaq turǵınları tárepinen tayarlanǵan milliy taǵamlar hám úrp-ádet, dástúrlerimizdi ózinde sáwlelendiriwshi kórgizbeler shólkemlestirildi.
Bayram ilajı dawamında milliy gúres, tas kóteriw, qoraz urıstırıw hám qoshqar dúgistiriw, arqan tartısıw hám basqa da milliy sport túrlerinen jarıslar shólkemlestirilip, jarıs jeńimpazları rayon hákimliginiń bahalı sawǵaları menen sıylıqlandı.

Adilbay Orazov,
Qaraqalpaqstan xabar agentligi sholıwshısı.