Usı jıl 20-mart kúni Nókis qalasındaǵı «Doslıq» kanalı boyında «Qádiriyatlarıń máńgi bolsın, Nawrız!» súreni astında bayramǵa baǵıshlanǵan saltanatlı ilajlar ótkerildi.

Úlkemizge báhárdiń kirip keliwi insan ruwxıyatın hám qálbin tolqınlandırıp, xalqımızdı eń súyikli milliy bayramlarımızdıń biri Nawrızǵa qaray talpındıradı. Bıyılǵı jasarıw hám jańalanıw máwsimi ullı maqsetlerge únles bolmaqta.

Kewiller qayırlı ámellerden nár alıp atırǵan hár bir kúnde insan qálbi bayram zawqı menen jasaydı. Usıǵan úylesimli tárizde elimiz boylap Nawrız benen baylanıslı dástúrler kórgizbesi, milliy mádeniy oraylardıń kórgizbeleri ótkerilmekte.

Bayram hám xalıq seyiline jıynalǵanlardı Qaraqalpaqstan Respublikası Joqarǵı Keńesiniń Baslıǵı A.Orınbaev Nawrız áyyyamı menen qızǵın qutlıqladı.

Respublikamız basshısı Nawrız bayramınıń arzıw-niyetlerimiz, ámeliy islerimiz benen únles ekenligin ayırıqsha atap ótti.

Xalqımızdıń pidákerli miyneti menen elimizde jańadan-jańa zamanagóy kárxanalar, qolaylı turaq jaylar, sociallıq hám mádeniy obektler, jol hám kópirler, baǵ hám qıyabanlar qurılmaqta. Insan qádirin ulıǵlaw, onıń turmıslıq máplerin hám sociallıq qorǵawdı támiyinlew, mútáj xalıq qatlamların qollap-quwatlaw hár bir watanlasımızǵa miyrim-shápáát kórsetiw iygilikli iske aylanbaqta.

Elimizdiń kóp ásirlik bayramı bolǵan Nawrız tábiyattı, qorshaǵan ortalıqtı kózdiń qarashıǵınday saqlaw, qásterlew filosofiyasın ózinde jámlegen. Mámleketimiz basshısınıń baslaması menen bıyılǵı jıl – “Qorshaǵan ortalıqtı qorǵaw hám «jasıl» ekonomika jılı” dep járiyalandı.

Úlkemiz boylap «Jasıl mákan» ulıwma milliy joybarı sheńberinde «Bizden keleshek áwladqa jasıl mákan, jasıl baǵ qalıwına belsene qatnasayıq!» súreni astında sayamanlı hám miyweli terek nállerin egiw qızǵın dawam etpekte.

Bayram saltanatlarında túrli mádeniy, milliy úrp-ádet, dástúr hám qádiriyatlarımızdı kórsetetuǵın kórgizbeler shólkemlestirilip, bayramǵa say hár qıylı bezewler menen bezelgen saxnalarda xalıq oyınları hám koncert baǵdarlamaları qoyıp berildi. Arqanda júrgen dárwazlardıń shápikligi, átkónshek tepken qız-jigitlerdiń shadlı kúlkisi adamlardı ózlerine erksiz tartadı. Shınında da, ana tábiyattı súyiw, ardaqlaw, ómir gúltajı bolǵan insandı qádirlew, Watanǵa muhabbat hám sadıqlıq sıyaqlı ideyalardı ózinde jámlegen «Nawrız» – xalqımızdıń eń áyyemgi bayramlarınıń biri bolıp esaplanadı.

Bayram seyillerinde xalqımızdıń názerine usınılǵan  folklorlıq ansambllerdiń, kórkem háweskerlik jámáátleriniń, baqsılar menen jırawlardıń, kórkem óner sheberleri jáne estrada qosıqshılarınıń, sonday-aq, balalar muzıka hám kórkem óner mektepleriniń atqarıwındaǵı koncert baǵdarlamaları hám saxnalastırılǵan bayram tamashaları jıynalǵanlarǵa úlken zawıq baǵıshladı.

Nawrızdıń máńgilik ruwxı ásirese, máhálleler turmısında ayqın kózge taslanadı.

Húrmetli Prezidentimiz hár bir shıǵıp sóylewinde qıytaq jerler xalqımız ushın úlken dáramat deregi, bul ele iske qosılmaǵan imkaniyat ekenin atap ótedi. Bul baǵdarda máhálleler turǵınları mámleket tárepinen qollap-quwatlanatuǵını, atap aytqanda, qıytaq jerde jetistiriletuǵın ónimlerdi satıp alatuǵın, qayta isleytuǵın hám eksport etetuǵın isbilermenlerge grant beriletuǵını aytıp ótildi. Qarózek rayonı Mádeniyat APJ turǵını Genjemurat Turdımuratov óziniń úy aldı qıytaq jerinen 4 ret ónim alıp kelmekte. Usınday miynetleri inabatqa alınıp, Prezidentimizdiń Pármanı menen «Dwstlik» ordeni menen sıylıqlanǵanın ayrıqsha atap ótemiz.

Bıyılǵı Nawrız bayramı pazıyletli Ramazan ayında bolıp ótip atırǵanı onı jáne de payızlı etpekte.

Xalqımız usı bayram keypiyatı dawam etip atırǵan demlerde xalqımız ullı ata-babalarımızdıń tileklerine qosılıp, elimizdiń tınıshlıǵı hám abadanlıǵı ushın niyet etpekte.

Bayram quwanıshları ráńbáreń koncert baǵdarlaması menen dawam etti.

Ázelden jaqsılıqqa janı qumar xalqımızdıń toy-merekeleri sport jarıslarısız ótpeydi. Sol aytqanday bıyılǵı Nawrız bayramında da xalqımızdıń milliy sport oyınları bolǵan gúres, arqan tartıs, tas kóteriw, qoshqar dúgistiriw hám zamanagóy ataması mas-restling bolǵan awız-eki tilde tayaqtı qoldan julıp tartıp alıw boyınsha bellesiwler ótkerildi.

Oǵan respublikamızdıń derlik barlıq qala hám rayonlarınan tısqarı, qońsılas Xorezm, Nawayı hám Buxara wálayatlarınan da kúshli sportshılar qatnasıp, óz sheberliklerin kórsetti.

Atap aytqanda, milliy gúres boyınsha jas óspirimlerge de gezek berilip, 26 kg salmaqta Ámiwdárya rayonınan Elbek Saparbaev, 40, 50, 60 kg salmaqta Nókis qalasınan Bahadır Sultamuratov, Iskender Polatov, Sherzad Medetbaevlar birinshilikti jeńip alǵan bolsa, 73 kg salmaqta ámiwdáryalı Nurbek Yuldashev Taxtakópir rayonınan kelgen Árman Sırǵabaevtı jeńip shıǵıwǵa miyasar boldı.

Al, eń awır salmaqta bolsa, bas bayraq ushın aqmańǵıtlı Zahiriddin Zaytov kegeylishi Baxtiyar Barlıqbaevtı upaylar esabında jeńip shıǵıwǵa miyasar boldı.

Qızlar arasında ótkerilgen bellesiwdiń finalında Taqıyatas rayonı palwanı Jasmina Azatova kegeylishi Gúlzabiyra Tilewimbetovanı jeńiliske ushırattı.

Mas-restling boyınsha jarıs bolsa, -80, +80 kg salmaq kategoriyası boyınsha ótkerilip, onda eń awır salmaqta  Ózbekstan Bodibilding hám fitnes federaciyasınıń Qaraqalpaqstan bólimi xızmetkeri  Miyras Mámbetniyazov nókisli Baxıt Shuwaqbaevtı jeńip shıǵıwǵa miyasar boldı. Bul salmaq kategoriyasında sıylı úshinshi orındı Ózbekstan mámleketlik dene tárbiya hám sport universiteti Nókis filialı studenti Rasul Atajanov iyeledi.

80 kg salmaqta ótkerilgen jarıslarda nókisli Erkebulan Qılıshbaev ámiwdáryalı Aǵabek Sabirovtı jeńip, bas bayraq iyesine aylandı.

Al, sıylı úshinshi orın Ózbekstan mámleketlik dene tárbiya hám sport universiteti Nókis filialı studenti Islam Baltabaevqa nesip etti.

Xalqımızdıń eń qızıǵıp tamashalaytuǵın oyını bolǵan arqan tartıs boyınsha ótkerilgen jarısta bolsa, Nókis qalasındaǵı Góne qala mákan puqaralar  jıyını elatınıń jigitleri Ózbekstan mámleketlik dene tárbiya hám sport universiteti Nókis filialı sportshıların oǵada qıyınshılıq penen jeńip shıǵıwǵa miyasar boldı.

Qoshqar dúgistiriw boyınsha jarıstıń bas bayraǵı Nókis qalasınan Elmurad Babajanovtıń qoshqarı Nókis rayonınan Dáwletmurat Allambergenovtıń qoshqarın jeńip shıǵıwǵa miyasar boldı.

Kóp milletli xalqımızdıń toyı, bayramları bir bolıp ketken. Nawrız da barlıq millet hám xalıq wákilleriniń súyikli bayramına aylanǵan. Búgin respublikamızda hár túrli millet hám xalıq wákilleri tınısh-tatıw jasap, onıń rawajlanıwına múnásip úles qospaqta.

Bayram qatnasıwshıları milliy kórgizbelerdi hám qosıq-namalardı tamashaladı. Túrli millet wákilleri menen shın kewilden sáwbetlesip, iygilikli tileklerin bildirdi.

Nawrız seyilleri respublikamızdıń barlıq rayon hám awıllarında dawam etpekte.

Qaraqalpaqstan xabar agentligi.

M.Hábibullaevtıń túsirgen súwretleri