Atayı sharwalar hám shabandozlar elatı bolǵan Bozataw rayonında «Qádiriyatlarıń máńgi bolsın, Nawrız!» súreni menen Nawrız ulıwmaxalıqlıq bayramı kóterińki keypiyatta belgilenip ótildi.

Bayramnıń tiykarǵı saltanatı ótkerilgen rayon orayında jaylasqan Amfiteatrdaǵı máresimde rayon hákimi B.Ubbiniyazov aymaq xalqın jasarıw hám jańalanıw áyyyamı bolǵan-Nawrız ulıwmaxalıqlıq bayramı menen qızǵın qutlıqladı hám xalıq xojalıǵınıń barlıq tarawlarında erisilgen nátiyjeler, ámelge asırılǵan jumıslardı ayrıqsha atap ótti.
Bayram ilajı respublikamızǵa belgili kórkem óner sheberleri hám rayonlıq mádeniyat bólimi xızmetkerleri tárepinen tayarlanǵan koncert baǵdarlaması menen dawam etti.
Ilaj dawamında milliy taǵamlar, kiyimler hám ónermentlerdiń ónimleri, xalqımızdıń úrp-ádet, salt-dástúrlerin ózinde sáwlelendirgen kórgizbeler shólkemlestirildi.
Bunnan soń xalıq seyiline ulasqan bayram tamashaları rayon orayında milliy sport oyınları menen dawam etti. Onda milliy gúres, arqan tartısıw boyınsha jarıslar ótkerilip, jeńimpazlar múnásip túrde sıylıqlandı.
Ásirese, Erkindárya awıl puqaralar jıyınınıń at shabar maydanında ótkerilgen at shabıs hám kókpar oyınları oǵada qızıqlı ótti. Atap aytqanda, bul jarıslarda shabandozlar 2, 5, 7 aylawǵa at shaptırıp, óz-ara jarıstı.
-Eki aylawǵa ótkerilgen báygide birinshi orındı iyelewge miyasar boldım,-deydi Tórtkúl elatınıń turǵını Aqnazar Seyitbekov.-Ata-babalarımızdan shınjırma-shınjır kiyatırǵan sharwalar bolǵanlıqtan xalqımızdıń milliy sportı bolǵan at shabıs, jorǵa hám kókpar oyınlarına oǵada qızıǵaman. Tay shabıstan basqa jorǵa jarısına da at qosıp onda da bas bayraqtı jeńip alıwǵa miyasar boldı. Nawrızdı usınday saltanatlı túrde ótkerip atırǵan rayon hákimligine úlken raxmet aytaman.
Atlar báygisiniń 5 aylawında erkindáryalı Paraxat shabandoz, 7 aylawda aqmańǵıtlı Nuraxmed shabandozlardıń atları bas bayraqtı jeńip alıwǵa eristi.
Kókpar oyınınıń bas salımın shaxamanlı Azamat Erejepov salıp, shólkemlestiriwshiler tárepinen bas bayraq penen sıylıqlandı.

Adilbay Orazov,
Qaraqalpaqstan xabar agentligi sholıwshısı