Úlkemizdiń barlıq aymaqlarında jasarıw hám jańalanıw bayramı bolǵan Nawrız ulıwma xalıq bayramı «Qádiriyatlarıń máńgi bolsın, Nawrız!» súreni astında kóterińki ruwxta ótkerilmekte.

Beruniy rayonında ótkerilgen bayramı ilajı jıynalǵanlarda umıtılmas tásirler qaldırdı.

Saltanatlı ilajdı Beruniy rayonı hákimi I.Xidirov ashıp berdi hám rayon xalqın bayram menen qızǵın qutlıqladı.

– Nawrız bizdi tábiyat perzenti bolıp, Watan topıraǵın, ana jerdegi hár bir ósimlikti kózimizge totıya etip jasawǵa úyretedi.

Nawrız bayramı elimizde jasap atırǵan, milleti, tili hám dinine qaramastan, barlıq watanlaslarımız ushın ulıwmaxalıqlıq bayramǵa, eń súyikli hám qádirli áyyyamǵa aylanǵanı menen sheksiz maqtanamız, – dep atap ótti hákim shıǵıp sóylegen sózinde.

Beruniy rayonında ótkerilgen bayram saltanatları milletleraralıq tatıwlıqtı sáwlelendirip, rayonda tatıw jasap atırǵan 12 millet hám xalıq wákilleriniń milliy kórinislerin sáwlelendiretuǵın seyilge aylandı.

Qara úyler ornatılıp, túrli millet wákilleriniń úrp-ádetleri kórsetildi. Báhár nápesine únles qosıqlar hám ayaq oyınlar hámmege bayram keypiyatın baǵıshladı,- deydi Beruniy rayonı hákimligi Málimleme xızmeti bólimi baslıǵı A.Urazova.

Mushayra keshesi, kitaplar kórgizbesi, sport hám milliy oyınlar Nawrız bayramına jáne de kóterińki ruwx baǵıshladı.

Bayram sońında rayon hákimi I.Xidirov qatnasıwshılardı sıylıqladı.

Saltanatlı bayram ilajları aymaqlarda dawam etpekte.

Qaraqalpaqstan xabar agentligi