Prezident pármanı hárekette

Sońǵı jıllarda Prezidentimiz tárepinen Qaraqalpaqstan Respublikası ushın qabıl etilgen qarar-pármanlar tiykarında respublikamız boylap, sonıń ishinde Taqıyatas rayonında da keń kólemli jumıslar ámelge asırılmaqta. Bunday iygilikli jumıslardıń ámelge asırılıp atırǵanlıǵı insan mápi barlıq nárseden ústin turatuǵın elimizde puqaralarımız turmısında óz sáwleleniwin tawıp, puqaralar óz ómirinde bolıp atırǵan ózgerislerden razı bolmaqta.

Prezidentimizdiń baslaması menen máhállelerde puqaralardıń bántligin támiyinlew, olardı kámbaǵallıqtan shıǵarıw maqsetinde engizilgen Sayxunabad, Úyshi, Zarbdor, Ǵijdiwan tájiriybeleri arqalı 2024-jılda 2844 jańa jumıs ornı jaratıldı. Rayonda “Sayxunabad” tájiriybesi boyınsha 472 puqara, “Úyshi” tájiriybesi boyınsha 2 014 puqara, “Zarbdor” tájiriybesi boyınsha 18, “Ǵijiwan” tájiriybesi boyınsha 125 puqaranıń bántligi támiyinlendi.
Bunnan basqada puqaralardıń bántligin támiyinlew baǵdarında, búgingi kún jaǵdayına bola 1041 puqaraǵa 13,2 mlrd sumnan artıq jeńilletilgen kredit qarjıları berildi. Bunıń nátiyjesinde puqaralar óziniń bántligin támiyinlep, qosımsha dáramat tabıw imkaniyatı jaratılmaqta.
Máhálle jetiligi tárepinen alıp barılıp atırǵan jumıslar haqqında birinshiden úyme-úy júrip xatlaw ótkerilip, hár bir úyge kirip barıp, bir shańaraqtı hár tárepleme úyreniwi nátiyjesinde 2735 puqara jumıs penen bánt boldı. 1180 nen aslamı úyinde ózin-ózi bánt etti. Bunda puqaralar tawıq baǵıw, qıytaq jer menen shuǵıllanıw arqalı shańaraǵına qosımsha dáramat kirgizbekte.
-Gúl dúkanımızǵa dáslep sırttan buyırtpa tiykarında gúllerdi aldıratuǵın edik. Soń ómirlik joldasım menen oylasıp, bankten jeńilletilgen kredit alıp, úy qaptalı qıytaq jerimizden ıssıxana qurıp gúllerdi ózlerimiz egip, jetistirip, gúl dúkanımızda sata basladıq. Házirgi waqıtta ıssıxanamızda gúllerdiń 15 ten aslam túri bar. Tiykarınan roza gúliniń úsh túrin jetistirip atırmız. Limon, qurma daraǵımız da miywe beriw aldında tur. Dáramatımız jaqsı. Bir kúnlik dáramatımız 700, 800 mıń sumdı quraydı,-deydi Dilnaza Muratova.
Jańa isbilermenlik subektleri de jaratılǵan bolıp, búgingi kún jaǵdayına bola, 320 isbilermenlik subekti shólkemlestirildi. Bul orınlarda da qosımsha jumıs orınlarınıń payda bolıwı negizinde bántligi támiyinlenbegen puqaralar jumıs penen bánt boldı. Rayonda puqaralardı sociallıq jaqtan qollap-kuwatlaw baǵdarında da keń kólemli jumıslar ámelge asırılmaqta.
Bunnan tısqarı Ministrler Kabinetiniń 2023-jıl 13-iyuldegi qararı tiykarında máhálleler infrastrukturasın jaqsılaw maqsetinde Taqıyatas rayonındaǵı 14 máhállege 7 mlrd sum qarjı ajıratıldı. Usı qarjılar esabınan jollar, ishimlik suwı, túngi jaqtılandırıw shıraqları, piyadalar jolı hám basqa da puqaralardıń kúndelikli turmısında mashqalaǵa aylanıp turǵan máseleler saplastırıldı. Rayonda hár bir taraw boyınsha investicialıq joybarlar bar bolıp, bular boyınsha da keń kólemli jumıslar ámelge asırılıp atır. Ózbekstan Respublikası Ministrler Kabinetiniń 2021-jıl 18-sentyabr kúngi Islam rawajlanıw banki hám OPEK qorı esabınan 44,6 mlrd sumlıq 9 obektte qurılıs jumısları baslandı. Sonnan, 2 mektep,
2 máhálle orayı, 5 baqshada qurılıs jumısları baslanıp, nátiyjeli dawam etpekte.
«Nurlı keleshek» APJ Taqıyatas rayonınıń eń shetki aymaqlarınıń biri. Ózbekstan Respublikası Prezidentiniń 2021-jıl 18-sentyabrdegi «Islam rawajlanıw banki hám OPEK xalıqaralıq rawajlanıw qorınıń qatnasıwında» Awıllıq jerlerdi turaqlı rawajlandırıw» joybarın ámelge asırıw ilajları haqqında» ǵı qararı tiykarında 90 orınlıq mámleketlik mektepke shekemgi bilimlendiriw mákemesi imaratı jańadan qurılmaqta. Balalar baqshası imaratı eki qabattan ibarat bolıp, «Nókis erkin qurılıs» JShJ tárepinen qurılmaqta.
-Awılımızda burın balalar baqshası joq edi. Mine balalar baqshası qurılıp atırǵanınan sheksiz quwanıshlımız. Qurılıs isleri jaqsı alıp barılıp atır. Bul ushın basshılarımızǵa, qurılısshılarımızǵa minnetdarmız,-deydi awıl turǵını A.Xojaniyazov
Investiciya joybarı tiykarında usı jılı jańadan qurılǵan 2 obekt paydalanıwǵa tapsırılıp atır. “Keneges” APJda 120 orınlıq (ajıratılǵan qarjı 6,3 mlrd) mektepke shekemgi bilimlendiriw shólkemi, “Doslıq” MPJ da Jınayı isler boyınsha sud imaratı (ajıratılǵan qarjı 6,9 mlrd) paydalanıwǵa tapsırıldı. Rayonda mámleketlik, jergilikli hám ishki jollar 472 km bolıp, 2017-2023-jıllarda 31 km jollar asfaltlandı. 175 km topıraq jollar qum-shaǵıl tas aralaspası jayǵızıldı. Sonnan, 2024-jılda 3,1 mlrd sum qarjı esabınan rayon aymaǵında 22 km jolǵa qum-shaǵıl tas aralaspasın jayıw jumısları ámelge asırıldı. 800 mln sum qarjı esabınan 1 km ishki jollar asfaltlandı.
Rayon gaz tarmaqları kárxanası esabında 317 km gaz tarmaǵı, 148 dana gaz bólistiriw punktleri bolıp, gúzgi-qısqı máwsimge tayarlıq kóriw ushın barlıq gaz bólistiriw punktleri tolıq tekseriwden ótkerildi hám 5,5 km gaz tarmaqları rekonstrukciyalandı, 16 km elektr uzatıw liniyaları zamanagóy SIP markalı kabel menen tartıldı, 4 dana transformator punkti, jámi 303 dana temir beton baǵanaları ornatıldı. Bunıń nátiyjesinde puqaralar óz turmısınan minnetdar bolıp jasamaqta.
Rayonda jasawshı 77 mıńnan aslam xalıqtıń sanı jıldan jılǵa artıp barmaqta. Balalardı balalar baqshasına qamtıw rayon boylap 76 procentke jetti. Rayonda 18 baqsha mámleketlik, 5 baqsha menshik- sheriklik tiykarında ashılǵan, 13 shańaraqlıq balalar baqshaları, 22 mektep, 1 qánigelistirilgen mektep bar. Jańa investiciyalıq joybarlar tiykarında rayonda jańa mektepke shekemgi bilimlendiriw shólkemleri hám mekteplerdiń qurılıs jumısları ámelge asırılıp atır.
Rayonda xızmet kórsetiw tarawında 291,4 mlrd swmlıq xızmetler kórsetilgen bolsa, qurılısta da salmaqlı jumıslar ámelge asırılıp, sońǵı 11 ayda 237 mlrd sumlıq kólemdegi jumıslar ámelge asırıldı.
Bunnan tısqarı, Prezidentimiz tárepinen tek qana Qaraqalpaqstan Respublikası ushın qabıl etilgen qarar hám pármanlar nátiyjesinde puqaralardı kóp waqıttan berli qıynap kiyatırǵan mashqalalarǵa sheshim tabıldı. Rayonda 459 puqaranıń turaq jayına kadastr hújjetleri berildi, 500 den zıyat puqaranıń turaq jayınıń tóbesi shiferlanıp berildi.
-Jayımızdıń tóbesinen jawın ótip, qıynalıp qalatuǵın edik. Húkimetimiz tárepinen járdem berilip, jayımızdıń tóbesi shiferlanıp berildi. Bunıń ushın Prezidentimizge minnetdarshılıǵımız sheksiz,-deydi Naymankól APJ turǵını B.Ashirova.
Mámleketimizde jumıssız jaslardıń bántligin támiyinlew boyınsha alıp barılıp atırǵan ilajlar Taqıyatas rayonında da óz kórinisin tappaqta. Jaqında ǵana rayon jaslarınıń bántligin támiyinlew ushın 30 jasqa 330 násilli qoyanlar subsidiya tiykarında tapsırıldı. Hár bir jasqa 11 bas qoyannan berilip ǵana qoymastan, bul qoyanlar ushın arnawlı ketekler hám bir aylıq ónimleri menen tapsırıldı.
-Mámleketimizde jaslar ushın keń kólemli imkaniyatlar jaratılmaqta. Jaslar isleri agentligi tárepinen bizlerge subsidiya tiykarında qoyanlar berildi. Mine házir úyde qoyanlardı baǵıw menen shuǵıllanıp atırman. Shıǵını az, tez kóbeyetuǵın jániwardan aldaǵı waqıtlarda shańaraǵımızǵa qosımsha dáramat tabıwdı niyet etip otırman,-deydi Nurgeldi Meredov.
Úlkemizge báhár, jańalanıw máwsimi kirip keliwi menen rayonda keń kólemli abadanlastırıw, kóklemzarlastırıw jumısları baslanıp, orınlarda bul ilajlar qızǵın alıp barılmaqta. Ekologiyamızǵa “Qorshaǵan ortalıqtı qorǵaw hám “jasıl” ekonomika” jılında úlken baslamalar, keń kólemli ilajlarǵa úles qosıwǵa bel baylaǵan jerleslerimiz qatarında taqıyataslılır da úlken úles qospaqta. Házirgi waqıtta rayonda keń kólemli abadanlastırıw, kóklemzarlastırıw jumısları baslanıp, orınlarda bul ilajlar qızǵın alıp barılmaqta. “Hár kúnińiz Nawrız bolsın!” degen ata-babalarımızdıń jaqsı tilegi menen baslanǵan Nawrız bayramı rayon turǵınlarınıń júzlerinde quwanıshlı keypiyat penen belgilenip, dawam etpekte.

G.Turdıshova, Qaraqalpaqstan xabar agentligi