Múnásibet

Hár qanday mámlekettiń turaqlı rawajlanıwı, puqaralıq jámiyeti institutlarınıń erkin hám nátiyjeli jumıs alıp barıwına baylanıslı. Jańa Ózbekstan sharayatında bul baǵdarda alıp barılıp atırǵan siyasat mámleketlik emes kommerciyalıq emes shólkemler, jámiyetlik birlespeler hám puqaralıq jámiyeti institutlarınıń mámleketlik basqarıwdaǵı rolin arttırıwǵa qaratılǵan.
Keyingi jıllarda húrmetli Prezidentimiz Shavkat Mirziyoevtiń abıraylı xalıqaralıq minberlerdegi bayanatlarında, jámiyetshilik wákilleri menen alıp barıp atırǵan ashıq sóylesiwlerinde Ózbekstandaǵı jańa mámleketlik emes kommerciyalıq emes shólkemlerdiń jumısına ayrıqsha itibar qaratılmaqta.
Mámleketlik emes kommerciyalıq emes shólkemler áhmiyetli máselelerdi sheshiwde ayrıqsha orınǵa iye. Olar mámleketlik strukturalar hám jámiyet arasında “kópir” wazıypasın atqaradı.
“Ózbekstan Respublikasınıń ayırım nızam hújjetlerine ózgerisler hám qosımshalar kirgiziw haqqında”ǵı nızam joybarı puqaralıq jámiyeti institutların rawajlandırıwǵa qaratılǵan. Hújjet Mámleketlik emes kommerciyalıq emes shólkemlerdiń jumısı, olardıń huqıqıy qorǵalıwın kúsheytiw hám hákimshilik járiymalardı qayta kórip shıǵıw boyınsha bir qatar ózgerislerdi názerde tutadı.
Mámleketlik emes kommerciyalıq emes shólkemlerdiń jumıs erkinligin bekkemlew, jámiyetlik qadaǵalawdıń tásirsheńligin arttırıwǵa qaratılǵan nızam joybarına bola, mámleketlik uyımlardıń lawazımlı shaxsları tárepinen mámleketlik emes kommerciyalıq emes shólkemlerdiń jumısına nızamǵa qayshı túrde aralasqan ushın lawazımlı shaxslarǵa hákimshilik juwapkershilik belgilenbekte.
Sonıń menen birge, mámleketlik emes kommerciyalıq emes shólkemlerdiń jumısın bunnan bılay da qollap-quwatlaw maqsetinde, bul tarawdaǵı ayırım hákimshilik huqıqbuzarlıqlar ushın járiyma muǵdarları sezilerli dárejede azaytılmaqta.
Endigiden bılay, Puqaralıq jámiyeti institutları tárepinen jámiyetlik qadaǵalawdıń juwmaǵı boyınsha tayarlanǵan hújjet 1 (bir) ay ishinde májbúriy kórip shıǵıladı. Usı múddette kórip shıqpaǵan lawazımlı shaxslar hákimshilik juwapkershilikke tartıladı.
Sonday-aq, jańa nızam boyınsha aldawshılıq yamasa talan-tarajlıq jınayatı ushın sudlanǵanlar jámáát fondın asha almaydı.
Hár bir grant hám joybar haqqında jámiyetshilikke maǵlıwmatlar berip barıladı.
Bul nızam joybarı menen “Mámleketlik emes kommerciyalıq emes shólkemler haqqında”ǵı, “Jámiyetlik fondlar haqqında”ǵı, “Jámiyetlik qadaǵalaw haqqında”ǵı hám “Mámleketlik bajı haqqında”ǵı nızamlarǵa jáne Hákimshilik juwapkershilik haqqındaǵı hám Salıq kodekslerine qosımshalar hám ózgerisler kirgiziw rejelestirilmekte.
Ulıwma alǵanda, nızam joybarında mámleketlik emes kommerciyalıq emes shólkemlerdiń huqıqları menen máplerine baylanıslı jaqsı usınıslar bar. Keleshekte orınlarda mámleketlik emes kommerciyalıq emes shólkemlerdi keńnen tartqan halda nızam joybarın dodalaw hám onı bunnan bılay da jetilistiriwge xızmet etetuǵın usınıslar alıw rejelestirilgen.
Bul nızam mámleketlik emes kommerciyalıq emes shólkemlerdi mámleket tárepinen jáne de qollap-quwatlawǵa, olardıń jumısınıń erkinligi, huqıqları hám nızamlı mápleriniń qorǵalıwın támiyinlewge, ashıq-aydınlıǵın arttırıwǵa hám bul tarawda huqıqtı qollanıwdıń birden-bir ámeliyatın jolǵa qoyıwǵa xızmet etedi.

T.Romanov,
“Yuksalish” háreketi
Qaraqalpaqstan Respublikası
aymaqlıq bólimi baslıǵı .
Qaraqalpaqstan xabar agentligi