Búgin jedel ózgerip atırǵan dúnyadaǵı áhmiyetli máselelerdiń biri bolǵan korrupciyanıń aldın alıw hám oǵan qarsı gúresiw máselesine, mámleketimiz siyasatınıń eń ústin turatuǵın baǵdarlarınıń biri retinde ayrıqsha itibar qaratılmaqta.

Mámleketimizde korrupciyaǵa qarsı gúresiw salasında izbe-iz mámleketlik siyasat alıp barılmaqta. Onıń tiykarǵı baǵdarlarınıń biri sud sistemasında ashıq-aydınlıq hám ádillikti támiyinlew bolıp tabıladı.
Sud uyımlarındaǵı korrupciya puqaralardıń mámleketke bolǵan isenimin joǵaltıp, insan huqıqlarınıń sistemalı túrde buzılıwına tiykar jaratadı.
Qaraqalpaqstan Respublikası sudı hám Qaraqalpaqstan Respublikası hákimshilik sudı birgelikte korrupciyaǵa qarsı gúresiw máselelerine baǵıshlap ótkergen májiliste de usı máseleler dodalandı.
Qaraqalpaqstandaǵı barlıq sudyalar hám sistema xızmetkerleri qatnasıwındaǵı usı konfrenciya aldında, Prezidentimizdiń usı jıl 5-mart kúni Korrupciyaǵa qarsı gúresiw boyınsha milliy keńes májilisinde sóylegen sózi hám usı májiliske arnalǵan kórsetiw qoyıp berildi. Soń, Qaraqalpaqstan Respublikası sudı baslıǵı K.Tarixov hám Qaraqalpaqstan Respublikası hákimshilik sudı baslıǵı A.Nurlipesovlar mámleketimizde korrupciyaǵa qarsı gúresiw boyınsha belgilep berilgen wazıypalardıń mazmun-mánisi, maqseti hám jámiyetimizdi rawajlandırıwdaǵı áhmiyeti haqqında hár tárepleme pikir bildirdi. Huqıqıy, demokratiyalıq mámleket qurıp atırǵan mámleketimizde bul illetke shek qoyıw nızam ústinligi hám hámmeniń teńligi hám juwapkershiligi, mámlekettiń rawajlanıwında zárúr faktor bolıwın belgileydi. Bul process sudtı anıq ádillik qorǵanına aylandırıw, puqaralardıń huqıqları menen erkinliklerin qorǵawda sudyalarǵa úlken juwapkershilik júkleytuǵınlıǵın atap ótti.
Sonıń menen birge, ilajda sudyalar hám sistema xızmetkerleri de shıǵıp sóylep, Prezidentimizdiń sózinen kelip shıǵıp, zárúr wazıypalar, korrupciyaǵa qarsı gúresiw boyınsha ámelge asırılıwı kerek bolǵan jumıslardı dodalap, anıq ilajlar belgilep alındı.
Korrupciyaǵa qarsı gúresiw boyınsha milliy keńes májilisinen soń Joqarı sud baslıǵı B.Islamov mámleketimizdegi barlıq sudyalar korpusı hám sud xızmetkerlerine múrájat jollaǵan edi. Ilajda usı múrájat te hár tárepleme úyrenip shıǵıldı.
Múrájattten kelip shıǵıp sud sistemasında korrupciyanıń aldın alıw boyınsha belgilep berilgen áhmiyetli wazıypalar, usı processte sudyalar hám sistema xızmetkerleriniń roli, bul illetke qarsı gúresiwdiń aktual mexanizmleri tuwralı pikir alıstı. Oǵan qarsı gúresiw boyınsha tiyisli ilajlar belgilep alındı.

Gulayım Ganieva,
Qaraqalpaqstan Respublikası sudınıń bas konsultantı.
Qaraqalpaqstan xabar agentligi.