Xalqımızdıń júregine eń jaqın bayramlardıń biri bolǵan Nawrız bayramı respublikamızdıń basqa aymaqlarında bolǵanı sıyaqlı, tariyxıy bes qalanıń biri bolǵan Shımbayda rayonında da oǵada kewilli túrde belgilendi.

Elimizdiń eski tariyxı, bay mádeniyatı hám biybaha qádiriyatların ózinde jámlegen bul bayramǵa keń jámiyetshilik wákilleri qatnasıp, Nawrız tamashalarınıń ráńbáreń hám mazmunlı ótiwine ózleriniń úleslerin qostı.
Bayramnıń tiykarǵı saltanatı bolıp ótken qala orayındaǵı Amfiteatrda rayon hákimi Aybek Tajetdinov aymaq xalqın Nawrız bayramı menen qutlıqlap, elimizge óziniń eń jaqsı tileklerin bildirdi.
Sońınan respublikamızǵa belgili kórkem óner sheberleri, Balalar muzıka hám kórkem óner mektebi tárbiyalanıwshıları hám xalıq talantlılarınıń atqarıwında teatrlastırılıǵan koncert baǵdarlaması jıynalǵanlardıń názerine usınılıp, bul ilaj qatnasıwshılarına ózgeshe zawıq baǵıshladı.
Sonıń menen birge, bayramda xalqımızdıń milliy qol óneri buyımları, taǵamları, salt-dástúrleri kórgizbesi shólkemlestirilip, eń jaqsı tayarlanǵan kórgizbeler rayon hákimligi tárepinen múnásip túrde xoshametlendi.
Sonday-aq, Nawrız bayramı múnásibeti menen Taǵjap awıl puqaralar jıyını aymaǵındaǵı at shabar maydanında xalqımızdıń milliy sport oyınları bolǵan at shabıs, milliy gúres, arqan tartıs, qoshqar dúgistiriw hám qoraz urıstırıw boyınsha jarıslar ótkerilip, jarıs jeńimpazları shólkemlestiriwshiler tárepinen sıylıqlandı.
-Arqan tartısıw jarısında finalǵa shekem jetip kelip, bas bayraq ushın bellesiwde Páshenttaw elatınıń jigitlerin jeńip shıǵıwǵa miyasar boldıq,-deydi Qızılózek awıl puqaralar jıyını komandası aǵzası Saylawbay Saparniyazov.-Bul jeńis bizlerden beter awılımız turǵınların sheksiz quwanıshqa bóledi. Sebebi, komandamız ushın birinshi gezekte eldiń abırayı joqarı turadı.
Nawrız seyilleri búgingi kúni Shımbay rayonınıń barlıq aymaqları boylap keń túrde bolıp ótpekte.

Adilbay Orazov,
Qaraqalpaqstan xabar agentligi sholıwshısı.