Berdaq atındaǵı Qaraqalpaq mámleketlik universitetinde “Ximiya hám azıq-awqat texnologiyaları baǵdarında zamanagóy ilimiy-texnologiyalıq hám bilimlendiriw birge islesiw, turaqlı rawajlanıw” atamasında xalıqaralıq konferenciya bolıp ótti.

Onda Ózbekstan Ilimler akademiyasınıń prezidenti Sh.Ayupov, Qaraqalpaqstan Respublikası Joqarǵı Keńesiniń komitet baslıǵı M.Atamuratov, sırt mámleketlerden ilimpazlar, qánigeler hám bilimlendiriw tarawınıń wákilleri qatnastı.
Konferenciyanı ÓzR IA akademigi, Berdaq atındaǵı Qaraqalpaq mámleketlik universitetiniń rektorı A.Reymov alıp bardı.
Konferenciyada tiykarǵı itibar ekonomikanıń globallasıwı sharayatında óndiris tarawı kárxanalarınıń áhmiyetli mashqalaları hám olardı sheshiw jolları, bul baǵdardaǵı xalıqaralıq tájiriybeni úyreniw, sheriklik qatnasıqların jolǵa qoyıw, qábiletli jaslardıń innovaciyalıq ideyaları menen qollanbaların ilimiy tiykarlaw, sonday-aq, ilimiy qollanbalardıń nátiyjelerin xalıqaralıq standartlarǵa juwap beretuǵın innovaciyalıq usıllar hám texnologiyalardı qollanıw arqalı óndiristiń tiyisli tarmaqlarında nátiyjeli paydalanıw ilim tarawlarında izertlewler alıp barıwdıń áhmiyetli maqseti ekenligi atap ótildi.
Bunnan soń, Qaraqalpaqstan Respublikası Joqarǵı Keńesiniń komitet baslıǵı M.Atamuratov, Ózbekstan Ilimler akademiyasınıń prezidenti Sh.Ayupovlar shıǵıp sóylep, Prezidentimiz tárepinen ilim tarawına hám bul tarawda jumıs alıp barıp atırǵan ilimpazlarǵa kórsetilip atırǵan ayrıqsha itibar hám ǵamqorlıq nátiyjesinde búgingi kúnde respublikamızdıń barlıq baǵdarlarda turaqlı rawajlanıwına xızmet ete alatuǵın ilimiy kadrlar hám ilimiy innovaciyalardıń sanı artıp atırǵanın atap ótip, konferenciya jumıslarına tabıslar tiledi.
Konferenciyanıń tiykarǵı maqseti – ximiya hám azıq-awqat texnologiyaları tarawında jańa ilimiy qollanbalardı, innovaciyalıq texnologiyalardı hám olardı ámeliyatqa engiziw usılların dodalaw bolıp esaplanadı. Sonday-aq, bul ilajda taraw boyınsha turaqlı rawajlanıwdı támiyinlew, ekologiyalıq taza texnologiyalardı engiziw hám óndiris processlerinde resurslardı únemlewge baylanıslı máseleler de kórip shıǵıldı.
Atap ótilgenindey, sońǵı jıllarda mámleketimizde ximiya hám azıq-awqat sanaatı mámleketimiz ekonomikasınıń tiykarǵı baǵdarlarınan biri bolǵan áhmiyetli tarmaqlarǵa aylandı. Sebebi, bul tarawlarda bir qatar reformalar keń kólemde ámelge asırılıp, ekonomikalıq jumısta óndiris hám azıq-awqat ónimleriniń ornı menen rolin arttırıw, xalıqtıń abadanlıǵın támiyinlew boyınsha áhmiyetli ilajlar ámelge asırılmaqta.
Konferenciya jumısları dawam etip, sırt ellerden kelgen ilimpazlar, qánigeler hám bilimlendiriw tarawınıń wákilleri tarawdıń áhmiyetli máseleleri, jańa ilimiy jetiskenlikler, texnologiyalıq jańalıqlar hám turaqlı rawajlanıw perspektivaları haqqında bayanatlar jasadı.
Konferenciya kúnniń ekinshi yarımında, sekciyalarda óz jumısların dawam etti. Onda ximiya hám azıq-awqat texnologiyaları tarawındaǵı innovaciyalar, ilimiy-izertlew jumısları hám ámeliy sheshimler haqqında tereń pikirlesiwler ótkerildi. Xalıqaralıq konferenciyanıń maqseti – global kólemde tarawda ilimiy birge islesiwdi rawajlandırıw, jańa bilim hám tájiriybe almasıw, turaqlı rawajlanıw baǵdarında jańa imkaniyatlar jaratıw bolıp esaplanadı. Ilaj, sonday-aq, universitettiń ilimiy potencialın arttırıw hám xalıqaralıq kólemde ilimiy izertlewlerdi nátiyjeli túrde alıp barıw perspektivaların kórsetti.
Qatnasıwshılar konferenciyanıń joqarı dárejede shólkemlestirilgenin, bayanatlar hám sekciyalarda alıp barılǵan dodalawlar nátiyjeli bolǵanın atap ótti. Bunday ilajlar bilimlendiriw hám ilim tarawındaǵı óz-ara birge islesiwdi kúsheytiw, jańa texnologiyalar hám ilimiy jetiskenliklerdi ámeliyatqa engiziwde áhmiyetli orın iyeleydi.

Qaraqalpaqstan xabar agentligi.