Men teatrǵa tez-tezden barıp turaman, sebebi teatr adamnıń ruwxıy jáne mádeniy rawajlanıwı ushın júdá áhmiyetli.

Biraq bul hár kimniń jekke pikiri. Eger sen teatrdan lázzet alsań, pesalar, spektakllerdi kórip, aktyorlardıń ónerin bahalaǵıń kelse, onda tez-tezden teatrǵa barıw – bul jaqsı ideya. Teatr sana-sezimdi keńeytedi, emociyańa, ómirdi tereńirek seziniwge járdem beredi, jáne jurnalist sıpatında shıǵarma dóretiwge tásir etiwi múmkin.
Insannıń ruwxıy dúnyasın kóteriwde, oy-pikirin tereńlestiriwde teatr kórkem óneriniń ornı úlken. Sebebi, kórkem óner adamlardı jaqsılıqqa shaqıradı, eń gózzal sezimlerdi sawǵa etedi. Teatr jaysha aytqanda ápiwayı tamashaxana emes, al tárbiya, mádeniyat, ruwxıylıq hám bilim mákanı bolıp tabıladı.
1961-jılı YuNESKO janındaǵı Xalıqaralıq teatr institutı tárepinen Avstriyanıń Vena qalasında bolıp ótken kongresste 27-mart – Xalıqaralıq teatr kúni dep belgilengen bolıp, búgingi kúnde dúnyanıń 100 den aslam mámleketlerinde bul sáne, teatr kórkem óneri xızmetkerleriniń kásiplik bayramı retinde keńnen belgilenbekte. Prezidentimizdiń baslaması menen mámleketimizde de mádeniyat hám kórkem ónerdi, atap aytqanda teatrdı rawajlandırıw mámleketimizdiń áhmiyetli wazıypalarınan birine aylandı.
Teatr bar eken, turmıs gózzal. Teatr degende, eń dáslep, kórkem ónerdiń úlken bir túrin túsiniw kerek. Sonıń menen birge, teatr, bul – tamasha, spektakldiń ózi. Dóretiwshiler insan kewiliniń injenerleri bolıp tabıladı.
Haqıyqattan da, teatr turmıs aynası, múqaddes dárgay esaplanadı. Onıń tárbiyaǵa baǵdarlanǵan sabaqları insanlardı adamgershilikke shaqıradı.
Teatr kórkem óneri hesh qashan eskirmeydi. Insan qanshelli telefon, internet hám kompyuter sıyaqlı málimleme texnologiyalarına úyrengen bolsa da, báribir ruwxıylıq dárgayı retinde órnek bolatuǵın teatrdıń ornı basqa. Sonlıqtan, biz xalqımızdı, ásirese, jaslardı teatrǵa keńirek tartıwımız kerek.

Uldawlet Shrajatdinova,
Berdaq atındaǵı Qaraqalapaq mámleketlik universiteti qaraqalpaq filologiyası hám jurnalistika fakulteti 4-kurs studenti.
Qaraqalpaqstan xabar agentligi.