Ózbekstan mámleketlik dene tárbiyası hám sport universiteti Nókis filialında «Biz bir shańaraqpız!», «Jańa Ózbekstan-milletler doslıǵı hám milliy mádeniyat oshaǵı!» súreni astında milletler aralıq tatıwlıq, doslıq hám diniy keńpeyillikti bekkemlewge baǵıshlanǵan festival bolıp ótti.

Ilajǵa filial basshıları, professor-oqıtıwshıları hám student-jasları qatnastı.
Festivaldı filial direktorı, professor Bayrambay Erimbetov Prezidentimizdiń basshılıǵında elimizde xalıqlar arasındaǵı doslıqtı bekkemlew, milletler aralıq tatıwlıq hám diniy keńpeyillikti támiyinlew boyınsha alıp barılıp mámleketlik siyasat haqqında keń túrde aytıp ótip, bul baǵdardaǵı jumıslardı respublikamız turmısı tiykarında túsindirip ótti.
Festival sheńberinde Ózbekstan mámleketlik dene tárbiyası hám sport universiteti Nókis filialı hám Ózbekstan mámleketlik konservatoriyası Nókis filialı studentleri elimizde jasawshı túrli millet wákilleriniń milliy kiyimlerinde sol xalıqlardıń kosıqların hám ayaq oyınların atqarıp, kesheniń mazmunlı ótiwine ózleriniń úleslerin qostı.

Adilbay Orazov,
Qaraqalpaqstan xabar agentligi sholıwshısı.