Kosovanıń Prishtina qalasında gandbol boyınsha U-19 hám U-21 jas kategoriyaları boyınsha xalıqaralıq gandbol federaciyası kubogi bolıp ótti.

Bul jarısta Ózbekstan U-19 komandası yarım finalǵa shekem jetip kelip, qola medalı ushın bolǵan bellesiwde AQSh U-19 saylandı komandasına 36:38 esabında jeńilip qaldı.
Al, Ózbekstan U-21 saylandı komandası finalǵa shekem jetip kelip, altın medal ushın bolǵan ushırasıwda AQSh U-21 saylandı komandası menen óz-ara ushırastı.
Oǵada keskin ótken oyın juwmaǵı, tilekke qarsı AQShlı jaslardıń 33:32 esabındaǵı jeńisi menen juwmaqlandı.
Quwanıshlı tárepi sonda, bul jarısta Ózbekstan saylandı komandası quramında qaraqalpaqstanlı Baymurat Reypnazarov hám Raxat Joldasbaevlar da qatnasıp, komandanıń sıylı orın iyelewine ózleriniń salmaqlı úleslerin qostı.

Adilbay Orazov,
Qaraqalpaqstan xabar agentligi sholıwshısı