Elimizde 11-mart sánesinen baslap aymaqlardı abadanlastırıw hám kóklemzarlastırıw maqsetinde, «Áhmiyetli bir aylıq» járiyalanǵan edi. Usı tiykarda búgingi kúni respublikamız boylap keń kólemli jumıslar ámelge asırılmaqta.

Shımbay rayonı «Tazǵara» awıl puqaralar jıyınında puqaralardıń bántligin támiyinlew hám qosımsha dáramat alıwına járdem beriw boyınsha «Qıytaq jer mádeniyatı, qıytaq jerden nátiyjeli paydalanıw hám dáramat tabıw» atamasında seminar bolıp ótti.
Seminarǵa respublikalıq jumısshı topar aǵzaları, rayon basshıları, máhálle jetiligi, toǵay xojalıǵı qánigeleri menen aymaq turǵınları qatnastı.
Ilajda Qaraqalpaqstan Respublikasi Joqarǵı Keńesiniń Apparat baslıǵı J. Idiyatullaev, «Wzsanoatqurilishbank» AKB baslıǵı orınbasarı Sh. Yakupov hám basqalar shıǵıp sóylep, jergilikli xalıq penen tikkeley birge islesetuǵın máhálle jetiligi aǵzalarına azǵana jerden mol dáramat tabıw usılları kórsetildi hám puqaralardıń ózin-ózi bánt etiwine járdem beriw, óz aymaqlarında jerden joqarı ónim alıp atırǵan qıytaq jer iyelerin keńnen úgit-násiyatlaw kerekligi atap ótildi.
Ótkerilgen seminar dawamında «Jasıl mákan» ulıwma milliy joybarı sheńberinde hár qıylı terek nálleri egilip, Taǵjap awıl puqaralar jıyınındaǵı «Biybaysha» fermer xojalıǵına qaraslı ıssıxana hám Kókshi qala mákan puqarlar jıyını aymaǵındaǵı «Zantex» qospa kárxanasında alıp barılıp atırǵan jumıslar menen jaqınnan tanıstı.

Adilbay Orazov,
Qaraqalpaqstan xabar agentligi sholıwshısı.