Ózbekstan Respublikasınıń Qatar Mámleketindegi Ayrıqsha hám tolıq huqıqlı elshisi Ashraf Xwjaev «Ar-Raya» basılımına bergen intervyuinde ózine tán ózgeshelikke iye múbárek Ramazan ayı awızbirshilik ruwxı menen ajıralıp turatuǵının atap ótti. Onıń qosımsha etiwinshe, Ramazan jıyınları sociallıq tatıwlıq kórinisi sıpatında gózzal úrp-ádetlerimiz menen únlesip, jámiyetler arasındaǵı qarım-qatnastı da kúsheytedi. Saqawat, miymandoslıq sıyaqlı pazıyletler, ǵalaba xalıqlıq iftarlıq dasturxanlarınıń jayılıwı, islam tileklesligi, óz-ara tatıwlıqqa tiykarlanǵan qádiriyatlar jámlengen ilajlardıń shólkemlestiriliwi Qatar xalqına da tán, álbette. Ramazan dástúrleri hám taǵamları baǵdarındaǵı ayırım ózgesheliklerge qaramastan, mámleketlerimizdiń múbárek aydaǵı sociallıq hám ruwxıy baylanıslardı bekkemlewge qaratılǵan háreketleri uqsas.

– Ózbekstanda tereń ruwxıy tamırlarǵa iye Ramazan ayı shańaraqlar, tuwısqan-aǵayin hám jaqınlardıń jaqsı niyet penen iftar dasturxanı átirapında toplanıwı, meshitlerde taraba namazınıń oqılıwı, áhmiyetlisi, járdemge mútáj insanlarǵa qayır-saqawat isleniwinde kórinedi,-dedi Elshi. – Bul awızbirshilik, miyrim-shápáát, doslıq ortalıǵı húkim súretuǵın ay.

M.Pirmatova, ÓzA