Nókis qalasındaǵı «Aq quw» kompleksinde jaylasqan dúnyadaǵı eń úlken qara úyde «Ózbekstan-Qıtay» biznes forumı bolıp ótti.

Forumda Qaraqalpaqstan Respublikası Joqarǵı Keńesiniń Baslıǵı A.Orınbaev shıǵıp sóylep, eki mámleket basshılarınıń arasında ornatılǵan doslıq qatnasıqları jaqın sheriklik qatnasıqlardı bekkemlewge tiykar bolıp xızmet etip atırǵanın, sonday-aq, Qaraqalpaqstanda investorlar ushın jaratılǵan sharayatlar, Prezidentimiz tárepinen isbilermenlikti rawajlandırıw boyınsha tek ǵana Qaraqalpaqstan ushın berilgen jeńilliklerdi keń túrde atap ótti.

Onda Ózbekstan Respublikası Sırtqı isler ministriniń orınbasarı I.Xaydarov, Ministrler Keńesiniń Baslıǵı F.Ermanov, Qıtay Xalıq Respublikasınan kelgen, biznes ortalıǵı wákillerinen ibarat delegaciya, jergilikli isbilermenler, juwapker basshılar qatnastı.
Ótkerilgen forumda respublikamızdıń investiciyalıq tartımlıǵı, jańa joybarlarlardı ámelge asırıw boyınsha jaratılǵan imkaniyatlar, resurslar potencialı hám basqa da áhmiyetli baǵdarlar haqqında maǵlıwmatlar berilip, pikir-usınıslar bildirildi.
Forum investiciyalıq imkaniyatlardı dodalaw, isbilermenlik baylanısların ornatıw hám birgeliktegi joybarlardı ámelge asırıw ushın ózine tán maydanǵa aylandı hám bir qatar áhmiyetli kelisimlerge erisildi.
Ilaj sheńberinde region ekonomikasınıń perspektivalı tarmaqları boyınsha panel dodalawları, «B2B» ushırasıwları hám prezentaciyalar ótkerildi.

Qaraqalpaqstan xabar agentligi.