Paytaxtımız Nókis qalasında jaylasqan « Jaslar orayı» nda «Ishki turizm» yarmarkası ótkerildi. Ilaj Qaraqalpaqstan Respublikası Turizm basqarması tárepinen shólkemlestirilgen bolıp, tiykarǵı maqset aymaqlardıń turistlik potencialın asırıw, jergilikli sayaxatshılardı tartıw, turizm xızmetleri eksportın keńeytiwden ibarat.

Yarmarkada Qaraqalpaqstanda óziniń xızmetin kórsetip kiyatırǵan jergilikli turistlik kárxanalar, jaylastırıw orınları, solar qatarında miymanxana, xostel, miyman úyleri, sonday-aq basqa da turizm tarawındaǵı isbilermenlik subektleri hám student jaslar qatnastı.
Yarmarka miymanları ushın Nókis qalasındaǵı I.Savickiy atındaǵı Qaraqalpaqstan mámleketlik kórkem óner muzeyine, ónerment Salamat Allambergenovtıń úy galereyasına, hám «Ashshıkól» boyındaǵı “Qaraqalpaq etno awıl” turistlik obektleri boylap sayaxat shólkemlestirildi.
Yarmarka dawamında prezentayaciya ilajı bolıp ótti. Onda “AYIM TOUR”, “MUYNAK TOUR”,“DAMIR Hotel”, Nukus xalıqaralıq aeroportı prezentaciyaları, Qaraqalpaqstan Respublikası Turizm basqarmasınıń prezentaciyaları bolıp ótip, jıynalǵanlarǵa ózleriniń xalıqqa xızmet kórsetiw qolaylıqları, turistler ushın imkaniyatlar haqqında sóz etildi.
-Berdaq atındaǵı Qaraqalpaq ádebiyatı tariyxı muzeyi 1998-jılı shólkemlestirilgen bolıp, 2014-jılı qayta dizimnen ótti. Qaraqalpaqstan Respublikasında milliy mádeniy, tariyxıy, ádebiy miyraslardı úyreniwshilerge járdem beriw, Berdaq dáwirine tiyisli tariyxıy miyraslardı úyreniwshi jaslarǵa qolay shárayat jaratıp beriw arqalı mádeniy, ilimiy, ádebiy baǵdardaǵı ilajlardı ámelge asırmaqta. Muzeyimizdegi kórgizbe zalları hesh bir tamashagóydi itibarsız qaldırmaydı. Sońǵı waqıtları xalıqaralıq baylanıslardı bekkemlep, turistlerdiń de muzeyimizge itibarı artpaqta. Álbette, ishki turizm boyınsha alıp barılıp atırǵan jumıslar baǵdarında da muzeyimizge kelip tamashalawshılar kóbeymekte, -deydi muzeydiń ilimiy xızmetkeri R.Arziev.
Ilaj sheńberinde milliy ónermentlerdiń kórgizbesi, turistlik kárxana hám jaylastırıw orınlarınıń búgingi kúndegi imkaniyatların sáwlelendiriwshi kórgizbe hám prezentaciyalar, sonıń menen birge, isbilermenler arasında ishki turizmdi rawajlandırıw boyınsha óz-ara birge islesiw boyınsha ushırasıwlar shólkemlestirildi.
Maǵlıwmat ornında atap ótiw tiyis, Ózbekstan Respublikası Prezidentiniń 2024-jıl 12-yanvar kúngi “Respublikaǵa sırt elli turistler aǵımın keskin asırıw hám ishki turizmdi elede jedellestiriw ilajları haqqında”ǵı pármanınıń 13-bántinde ishki turizmdi qollap-quwatlaw, turistlik xızmetler hám ónimlerdi keńnen usınıw maqsetinde «Ózbekstan boylap sayaxat et!» ishki turizm yarmarkasın ótkeriw wazıypası belgilengen. Bul baǵdardaǵı alıp barılıp atırǵan jumıslar óz nátiyjesin kórsetpekte.
Kórsetkishlerge keletuǵın bolsaq, 2024-jıl dawamında Qaraqalpaqstanǵa 200,7 mıń sırt elli turistler kelgen bolsa, al ishki turizm kórsetkishi bolsa 2 mln. 240 milionnan astı. Búgingi kúnde Qaraqalpaqstanda ulıwma 112 jaylastırıw orınları bar bolıp, solardan 30 miymanxana, 51 miyman úyleri hám 31 xostel óz jumısın alıp barmaqta. Turistlik kárxanalar sanı bolsa 67 ge jetti.
Turistler sanınıń artıp atırǵanlıǵı biz ushın quwanıshlı jaǵday álbette. Al, ishki turizm jas áwladtıń watansúyiwshilik ruwxında tárbiyalanıp, tuwılǵan jerge degen súyispenshilik arttırıwı sózsiz.

G.Turdıshova, Qaraqalpaqstan xabar agentligi