Xalqımız ázelden bayramlardı, qutlı sánelerdi ayrıqsha tayarlıqlar menen kútip alıwdı úrdiske aylandırǵan. Ózbekstan Respublikası Prezidentiniń 2025-jıl 21-fevraldaǵı “2025-jılǵı Nawrız ulıwmaxalıqlıq bayramına tayarlıq kóriw hám onı ótkeriw haqqında”ǵı qararına muwapıq, orınlarda bayramǵa tayarlıq kóriw jumısları qızǵın dawam etpekte.

Kún sayın jaqınlasıp atırǵan ulıstıń ullı kúni – Nawrız bayramı aldınan Qaraqalpaqstan Respublikası sudında da qorshaǵan ortalıqtı kóklemzarlastırıw, tazalıǵın támiyinlew maqsetinde shembilik ótkerildi.
Shembilik barısında sud imaratında hám onıń átirapında abadanlastırıw jumısları alıp barıldı. Atızlar awdarılıp, tazalandı hám kóklemzarlastırıw jumısları ámelge asırıldı. Jańa terek hám gúl nálleri otırǵızılıp, tereklerdiń shaqaların tártipke keltiriw, háklew hám olardıń astın jumsartıw jumısları ámelge asırıldı.
Joqarı shólkemleskenlik penen ótkerilgen tazalıq hám abadanlastırıw jumıslarında belsene qatnasqan taraw xızmetkerleri bekkem awızbirshilik úlgisin kórsetip, ózleri miynet etip atırǵan imarat átirapınıń abat hám payızlı bolıwına úles qosıwǵa háreket etti.

Qaraqalpaqstan xabar agentligi.