Ózbekstan Respublikası Prezidentiniń «Kámbaǵallıqtı qısqartıw hám xalıqtıń turmıs abadanlıǵın arttırıw baǵdarındaǵı ilajlardı jańa basqıshqa alıp shıǵıw haqqında»ǵı pármanında, kámbaǵal shańaraqlarǵa járdem ilajları sociallıq shártnama tiykarında miynetke jaramlı shańaraq aǵzalarınıń bántligin támiyinlew, óziniń qıytaq jerinen nátiyjeli paydalanıw (egin egiw), shańaraq aǵzaları, sonıń ishinde, perzentleriniń bilim alıwı, kásip-óner hám shet tillerin úyreniwi, densawlıǵın qadaǵalawı, turaq jayın taza saqlaw sıyaqlı shártler esapqa alınǵan halda kórsetiletuǵını belgilep berilgen.

Usı qarardıń orınlanıwın támiyinlew maqsetinde Beruniy rayonında 20 shańaraq 20 qutı pomidor tuqımı hám ıqsham ıssıqxana ushın zárúr úskeneler menen támiyinlendi.
Sociallıq reestrge kirgizilgen puqara N.Sultanovanıń shańaraǵında da usınday jumıslar ámelge asırılmaqta. Házirgi waqıtta onıń shańaraǵına máhálle jetiligi tárepinen 20 qutı pomidor tuqımı, shirindi hám ıssıqxana ushın plyonkalar jetkerip berildi.
– Keleshekte jetistirgen nállerdi qıytaq jerime egip, artqan bólegin satıwdan ortasha 15 million sum muǵdarında dáramat alıwdı rejelestirip atırmız, – deydi ol.
Sonday-aq, shańaraǵındaǵı 5 sotıx jerge ıssıqxana shólkemlestirgen A.Eshimbetov házirgi waqıtta 7 mıń danadan aslam pomidor, bolgar burıshı, kapusta nállerin jetistirip, xalıqtıń qıytaq jerine egiwi ushın jetkerip beriwge tayarlamaqta. 8 jıllıq tájiriybege iye qıytaq jer iyesi bıyıl ortasha 150 million sum dáramat tabıwdı rejelestirgen.
Xalıqtıń sanı 6464 adamdı quraytuǵın Beruniy rayonındaǵı Beruniy awıl puqaralar jıyınında, xalıqtıń qıytaq jerden nátiyjeli paydalanıp, jılına 2-3 márte zúráát alıwı ushın tájiriybeli qıytaq jer iyeleri tárepinen usınıslar berilip kelinbekte. Aymaqtıń drayver tarawı sharwashılıq hám diyqanshılıqtı quraydı. Máhállede sociallıq reestrge kirgizilgen shańaraqlardıń sanı 134 bolıp, sonnan 61 shańaraq kámbaǵal dep tabılǵan, – deydi Beruniy rayonı hákimligi Málimleme xızmeti bólimi baslıǵı A.Urazova.

Qaraqalpaqstan xabar agentligi