Nókis qalasındaǵı «Jaslar orayı»nda belsendi volontyor jaslardı sıylıqlaw máresimi bolıp ótti.

Ilajda Jaslar isleri agentligi Qaraqalpaqstan Respublikası basqarması, Ózbekstan volontyorlar assosaciyası, Araldı Qutqarıw xalıqaralıq qorı Atqarıw komiteti Nókis filialı basshıları qatnastı.
Shıǵıp sóylegenler jaslardıń bul baslamaların qollap – quwatlawdıń áhmiyeti haqqında aytıp ótti. Sonday-aq, keleshekte usınday joybarlardıń kólemin ele de keńeytiw zárúrligi atap ótildi.
– Mámleket, joqarı bilimli, potencialı kúshli jaslar menen rawajlanadı. Elimizde zamanagóy kózkarasqa iye, sanalı, keń pikirge iye bolǵan jaslardıń jetilisip atırǵanlıǵı kóz quwandırarlı. Qaraqalpaqstan volontyorlar mektebine aǵza bolǵan jaslardıń kópshiligi óz zamanlaslarına órnek bolıp kelmekte. Qaraqalpaqstan volontyorlar mektebi tárepinen eki ay dawamında «Aral júrekleri» joybarı ámelge asırılıp, kem támiynlengen shańaraqlardıń perzentlerine inglis tili úyretildi. Hár bir volontyor 20 saat sabaq ótip, óz zamanlaslarınıń til úyreniwine járdem berdi, – deydi Araldı Qutqarıw xalıqaralıq qorı Atqarıw komiteti Nókis filialı baspasóz xızmeti bóliminiń baslıǵı R.Sharapova.
Joybarda belsene qatnasqan volontyorlarǵa Jaslar isleri agentligi Qaraqalpaqstan Respublikası basqarması, Ózbekstan volontyorlar assosaciyası, Qaraqalpaqstan volontyorlar mektebiniń arnawlı sertifikatı tapsırıldı.
Sonıń menen birge, «Aral júrekleri» joybarında ayrıqsha belsendilik kórsetken jaslar Araldı Qutqarıw xalıqaralıq qorı Atqarıw komiteti Nókis filialı tárepinen «Minnetdarshılıq xatı» menen de sıylıqlandı.

Qaraqalpaqstan xabar agentligi