Xabarıńız bar, Moynaq rayonın sociallıq-ekonomikalıq jaqtan rawajlandırıw, xalıqtıń bántligin támiyinlew, infrastrukturasın jaqsılaw máselelerin muwapıqlastırıw máseleleri Qaraqalpaqstan Respublikası Bajıxana basqarması baslıǵına da biriktirilgen. Házirgi waqıtta bajıxana basqarmasında dúzilgen jumısshı topar Moynaq rayonın sociallıq-ekonomikalıq rawajlandırıw, kámbaǵallıqtı qısqartıw máselelerin ornına shıqqan halda úyrenbekte.

Házirgi kúnlerde jumısshı topar wákilleri rayondaǵı xalıqtıń turaqlı dáramat dereklerine iye bolıwın támiyinlew maqsetinde úy sharayatında qıytaq jerinde diyqanshılıq, ıssıxanalar, sharwashılıq hám qusshılıq, isbilermenlik hám óndiris, xızmet kórsetiwdi jolǵa qoyıw máseleleri boyınsha úyreniw jumısların alıp barmaqta.
Hákim ata awıl puqaralar jıyınında jasawshı Amanbay Tańbaev shańaraq aǵzaları menen qıytaq jerinde ıssıxana shólkemlestirip, egin egiw menen bir qatarda qoyan baǵıw menen de shuǵıllanbaqta.
Al, “Qızıl jar” awılında jasawshı Shaxrizoda Axmedova bolsa úy sharayatında nan hám konditer ónimlerin islep shıǵarmaqta.
Úyreniw jumısları dawamında úy sharayatında miynet etip, shańaraǵına dáramat tawıp atırǵan isbilermen xalıq penen eksportshı hám ónimdi qayta islewshi kárxanalar arasında kooperaciya dúziw máseleleri de kórip shıǵıldı.
33,6 mıń puqara jasaytuǵın bul rayonda jumıssızlıq dárejesi 5,5 procentti quraytuǵının atap ótiw kerek. Joqarıdaǵı baǵdarlarda jumıslardıń shólkemlestiriliwi bolsa, ózin-ózi bánt etken xalıqtıń sanınıń artıwına hám rayon kóleminde sociallıq jaǵdaydıń jaqsılanıwına tiykar jaratadı.

Qaraqalpaqstan xabar agentligi