2025-jıl Mámleketimiz basshısı tárepinen «Qorshaǵan ortalıqtı qorǵaw hám «jasıl ekonomika» jılı dep járiyalanıwınıń tiykarında qorshaǵan ortalıqtı qorǵaw, tábiyǵıy resurslardan aqılǵa uǵras paydalanıw, biologiyalıq hár túrlilikti saqlaw, qolaylı energiyadan nátiyjeli paydalanıw hám keleshek áwladqa taza ekologiyalıq sistema qaldırıwday iygilikli maqsetler jámlengen.

Házirgi kúnde mámleketimizde qolaylı energetika sistemasına ótiw jolında jedel jumıs alıp barılmaqta. Sonıń ishinde, 2026-jılǵa shekem qayta tiklenetuǵın energiya derekleriniń úlesin 25 procentke jetkeriw belgilengen. Aziya infrastrukturalıq investiciya banki (AIIB) Ózbekstanǵa baǵdarlanǵan 3,1 milliard dollarlıq investiciyası menen mámleketimizdiń jasıl infrastruktura boyınsha úlken rejelerin qollap-quwatlamaqta.
Bul haqqında usı abıraylı qarjı strukturasınıń investiciya boyınsha bas direktorı Konstantin Limitovskiy óz pikirlerin bildirdi.
– Aziya infrastrukturalıq investiciya bankiniń Ózbekstandaǵı jumısı klimat ózgeriwine shıdamlılıqtı arttırıw, qayta tiklenetuǵın energiya dereklerine ótiw hám infrastrukturanı rawajlandırıwǵa qaratılǵan. Biziń mámleket tárepinen qollap-quwatlanatuǵın bul joybarlarımız mámlekettiń 2030-jılǵa shekemgi elektr energiyasınıń 54 procentin qayta tiklenetuǵın dereklerden islep shıǵarıw, sektorǵa 24 GVt jańa quwatlıq qosıw rejesine sáykes.
Turaqlı rawajlanıwdı támiyinlewge qaratılǵan AIIB investiciyası birinshi gezekte respublikanıń uzaq múddetli maqsetine sáykes. Biz hár bir joybar jergilikli klimat ústinligine sáykes keliwin támiyinlewge háreket etemiz.
Bankimiz keń kólemli infrastruktura, sonıń ishinde transport, suw xojalıǵı hám sanlı rawajlanıwǵa da itibar qaratadı. Máselen, mámlekettiń qayta tiklenetuǵın energiya imkaniyatın keńeytiwge járdem beretuǵın quyash, samal energiyasın islep shıǵarıw, akkumulyatorlardı saqlaw obektlerin birgelikte qarjılandırıw ushın global energetika kompaniyaları hám basqa institutlar menen birge islesiw jolların belsene izlep atırmız. Bul baǵdarda finanslıq hám texnikalıq járdem usınıs etiwden quwanıshlımız.
Jumısımız Ózbekstannıń Parij kelisimi sheńberinde jańalanǵan milliy isenimli háreketleri, sonday-aq, 2030-jılǵa shekem «Jasıl ekonomikaǵa ótiw boyınsha strategiyalıq tiykar»ı menen sáykes. AIIB klimat qáwpin bahalawdı milliy rejelestiriw hám byudjetlestiriwge integraciyalaw, klimat ózgeriwine shıdamlı ekonomika qurıwǵa járdemlesiw áhmiyetli.
Jámáátimiz energetika joybarların qollap-quwatlawdan tısqarı, gender teńlikke itibar qaratqan, jasıl infrastrukturaǵa ótiw arqalı jámiyettiń barlıq, ásirese, ázzi qatlamına payda keltiriwin támiyinlegen halda, inklyuziv klimat háreketin qollap-quwatlaw boyınsha da belsene islemekte. Processtiń bir bólegi sıpatında irrigaciya sistemasın jetilistiriwge de járdem bermekte. Nátiyjede awıl xojalıǵı sektorı tikkeley qollap-quwatlanbaqta.
Baǵdarlamamız turaqlılıqtı arttırıw ushın energetika, transport hám suw xojalıǵı tarawlarında alǵa qoyılatuǵın institucionallıq reformalardı da óz ishine aladı. Normativlik-huqıqıy bazanı bekkemlew hám turaqlılıqtı milliy rawajlanıw kún tártibine integraciyalaw arqalı bank Ózbekstannıń jasıl ótiw procesi bekkem hám inklyuziv bolıp qalıwın támiyinlemekte.
Rawajlanıwdı bahalawdıń tiykarǵı basqıshlarınan biri – Klimat ózgeriwi boyınsha Milliy siyasat hám Klimat ózgeriwi boyınsha gender háreketler rejesin (CCGAP) tabıslı ámelge asırıw, sonday-aq, mámleketlik kárxanalar ushın klimat hám turaqlılıq qáwpin járiyalawdı qabıl etiw bolıp esaplanadı. Bul ilajlar qayta tiklenetuǵın energiya maqsetlerine erisiw, sonıń menen birge klimat ózgeriwine ulıwma shıdamlılıqtı arttırıw imkaniyatın beredi.

Muharamma Pirmatova jazıp aldı. ÓzA