Ózbekstannıń Belarustaǵı Ayrıqsha hám tolıq huqıqlı elshisi Rahmatulla Nazarov usı mámlekettiń Monopoliyaǵa qarsı tártipke salıw hám sawda ministri Artur Karpovich penen ushırastı.

Sóylesiw waqtında sawda-ekonomikalıq qatnasıqlardıń házirgi jaǵdayı hám Belarus Prezidenti Aleksandr Lukashenkonıń 2024-jıl fevral ayında Ózbekstanǵa saparınıń juwmaqları boyınsha tastıyıqlanǵan «jol kartası»nıń orınlanıwı dodalandı.
Belarus tárepi ǴMDA Monopoliyaǵa qarsı siyasat boyınsha mámleketleraralıq keńesi sheńberindegi birge islesiwdiń joqarı dárejesin atap ótti. Ministrliktiń strukturalıq bólimi – Universal sawda birjası menen sheriklikke ayrıqsha itibar qaratıldı. Házirgi waqıt usı birjada ózbek rezidentleri 188. Óz-ara sawda kólemi 1,5 esege artqan, elektron sawdada ónim túrleri kóbeymekte.
Tárepler Belarus jetekshisiniń mámleketimizge saparı dawamında qol qoyılǵan Ózbekstan Básekini rawajlandırıw hám tutınıwshılardıń huqıqın qorǵaw komiteti hám Monopoliyaǵa qarsı tártipke salıw hám sawda ministrligi arasındaǵı kelisim sheńberindegi nátiyjeli háreketlerdiń áhmiyetin atap ótti. Belgilengen wazıypalardı orınlaw ushın anıq múddet hám juwapker orınlawshılar belgilengen birgeliktegi ilajlar rejesin islep shıǵıw baslaması maqullandı.
Ministr Artur Karpovich nátiyjeli birge islesiwdi dawam ettiriw, processke tiyisli uyım hám shólkemlerdi tartıwǵa tayar ekenligin bildirdi.

Aziza Alimova, ÓzA