Kegeyli rayonındaǵı Júzimbaǵ awıl puqaralar jıyınında «Jasıl mákan» ulıwma milliy joybarı sheńberinde «Xalıqtıń qıytaq jer hám ijara jerlerinen nátiyjeli paydalanıw arqalı dáramatların arttırıw ilajları» atamasında kórgizbeli seminar bolıp ótti.

Seminarǵa respublikalıq jumısshı topar aǵzaları, rayondaǵı mákeme, kárxana hám shólkem basshıları, arnawlı qánigeler qatnastı.
Ilajda «Ózeltexsanoat» awqamınan N.Tolipov, Qaraqalpaqstan Respublikası Joqarǵı Keńesiniń komitet baslıǵı B.Seytnazarov hám rayon hákimi A.Kamalov hám basqalar shıǵıp sóylep, aymaqlarda qıytaq jerden nátiyjeli paydalanıw, diyqanshılıq mádeniyatın qáliplestiriw hám dáramat dereklerin arttırıw boyınsha ózleriniń pikir-usınısların bildirdi.
Sonı aytıp ótiwimiz kerek, házirgi waqıtta Kegeyli rayonında 7000 gektar qıytaq jerler bolıp, bul jerler xalıqqa qosımsha dáramat deregi bolıp, olardıń abadanlıǵın arttırıwda úlken áhmiyetke iye.
Seminarda ilaj qatnasıwshıları tárepinen qıytaq jerden nátiyjeli paydalanıw, ózin-ózi bánt etiw hám tarmaqtı rawajlandırıw máseleleri dodalandı. « Bir máhállede-bir ónim» principi tiykarında eksportqa qolaylı eginler egiw, egislik maydanlardıń shetlerine nál egiw arqalı kámbaǵallıqtan shıǵarıw hám abadanlıqqa erisiw imkaniyatları haqqında tereń túsindirildi.
-Bul seminardı ótkeriwden tiykarǵı maqset, puqaralardıń qıytaq jerden nátiyjeli paydalanıw imkaniyatların keńeytiw, olardıń eksportqa jaramlı eginlerdi jetistiriw boyınsha bilimlerin arttırıw hám usı arqalı ekonomikalıq imkaniyatlardı jaratıw, kámbaǵallıqtı qısqartıw hám bántligin támiyinlewden ibarat,-deydi Ózbekstan Máháller assosaciyası Kegeyli rayonlıq bóliminiń baslıǵı Maqset Xoshanov-Demek, máhálleler kesiminde qıytaq jer mádeniyatın arttırıw arqalı jańa texnologiyalar járdeminde eginlerdi egiw hám olardan dáramat alıwdı úyretiw zárúr. Bul seminar – ózgeris hám rawajlanıwǵa qoyılǵan qádem boldı. Sebebi, jumıstı birgelikte rawajlandırıw arqalı ǵana abadan turmısqa qádem qoyıw múmkin.

Adilbay Orazov,
Qaraqalpaqstan xabar agentligi sholıwshısı.