Qaraqalpaqstan Respublikası Qorǵanıw isleri basqarmasınıń jıyın punktinde Watan aldındaǵı muqaddes minnetin orınlawǵa atlanǵan jigitlerdi múddetli áskeriy xızmetke saltanatlı shıǵarıp salıwǵa baǵıshlanǵan máresim bolıp ótti.

Onda Arqa-Batıs áskeriy okrugi áskerleri sárkardasınıń birinshi orınbasarı polkovnik A.Nabiev, Qaraqalpaqstan Respublikası Ministrler Keńesi, Ruwxıy-aǵartıwshılıq orayı Qaraqalpaqstan bólimi, Jaslar isleri agentligi, Ájiniyaz atındaǵı Nókis mámleketlik pedagogikalıq institutı, mámleketlik hám jámiyetlik shólkemlerdiń wákilleri, Qurallı Kúshler veteranları, nuraniyler, aqsaqallar hám shaqırılıwshılardıń tuwǵan-tuwısqanları qatnastı.
Ilajda shıǵıp sóylegenler Watandı qorǵawday muqaddes hám maqtanıshlı wazıypanı orınlawǵa tayar turǵan jigitlerge jaqsı tileklerin bildirdi. Ana watanın qorǵaw, onıń shegaraların kózdiń qarashıǵınday qásterlep saqlaw juwapkershiligi tek ǵana usınday márt jigitlerge nesip etetuǵının atap ótti.
Nókis garnizonı áskeriy okrestri hám mádeniyat bólimi tárepinen atqarılǵan nama hám qosıqlar jigitlerge kóterińki keypiyat baǵıshlap, sapar aldınan kewillerin kóterdi.
Barlıq sınaqlardan ótip, ruwxıy hám fizikalıq jaqtan salamat ekenligin dálillegen jigitler Ózbekstan Respublikası Qorǵanıw ministrligi hám Ishki isler ministrligi bólimlerine jol aldı. Watandı isenimli qorǵawǵa wáde bergen jigitler áskeriy xızmetti ótew ushın “Nókis” temir jol vokzalınan jónep ketti.

Qaraqalpaqstan xabar agentligi