Ózbekstan “Milliy tiklanish” demokratiyalıq partiyasınıń Qaraqalpaqstan Respublikası Joqarǵı Keńesindegi frakciyasınıń májilisi bolıp ótti.

Ilajda ÓzMTDPdan Qaraqalpaqstan Respublikası Joqarǵı Keńesine hám Xalıq deputatları Nókis qalalıq hám rayonlıq Keńeslerine saylanǵan deputatlar, partiya belsendileri hám ǵalaba xabar qurallarınıń wákilleri qatnastı.
Májilisti frakciya aǵzası, Qaraqalpaqstan Respublikası Joqarǵı Keńesiniń deputatı P.Reymov alıp bardı.
Májiliste Qaraqalpaqstan Respublikası Joqarǵı Keńesindegi Ózbekstan “Milliy tiklanish” demokratiyalıq partiyası frakciyası tárepinen Ózbekstan Respublikası Prezidentiniń 2022-jıl 28-yanvardaǵı PP-60-sanlı pármanı menen tastıyıqlanǵan “2022-2026 jıllarǵa mólsherlengen Jańa Ózbekstannıń rawajlanıw strategiyası»nıń Qaraqalpaqstan Respublikası hám Xorezm wálayatındaǵı baslawısh klass oqıwshıların basqıshpa-basqısh biypul azıq-awqat penen támiyinlew haqqında”ǵı 45-maqsetiniń Qaraqalpaqstan Respublikası Mektepke shekemgi hám mektep bilimlendiriwi ministrligine qaraslı ulıwma bilim beriw mekteplerinde orınlanıw barısın jámiyetshilik monitoringi tiykarında úyreniw jumıslarınıń juwmaǵı boyınsha máseleler kórildi.
Qaraqalpaqstan Respublikası Mektepke shekemgi hám mektep bilimlendiriwi ministrligi basshılarınıń esabatları tıńlanıp, respublikamızda ulıwma orta bilimlendiriw mekteplerinde baslawısh klass oqıwshıların keytering usılında awqatlandırıw boyınsha alıp barılıp atırǵan jumıslar haqqında maǵlıwmatlar berildi.
Oqıw jılı dawamında 726 ulıwma bilim beriw mekteplerindegi 144 mıńnan aslam baslawısh klass oqıwshıların biypul awqatlandırıw rejelestirilip, bul ushın Qaraqalpaqstan Respublikası Ministrler Keńesiniń 2024-jıl 23-avgust kúngi protokolı menen Qaraqalpaqstan Respublikasındaǵı ulıwma orta bilim beriw mekteplerinde Keytering tiykarında salamat awqatlandırıw sistemasın shólkemlestiriw jumısların qadaǵalawshı jumısshı topar quramı tastıyıqlanǵan. Sonday-aq, Ózbekstan Respublikasınıń “Mámleketlik satıp alıwlar haqqında”ǵı Nızamına muwapıq ulıwma orta bilim beriw mekteplerinde keytering tiykarında salamat awqatlandırıw sistemasın shólkemlestiriw boyınsha “satıp alıw (xarid) komissiyası” quramı tastıyıqlanǵan.
Ministrler Keńesiniń, Mektepke shekemgi hám mektep bilimlendiriwi ministrliginiń saytlarında, ǵalaba-xabar qurallarında ulıwma orta bilim beriw mekteplerinde baslawısh klass oqıwshıların biypul awqatlandırıw boyınsha ótkeriletuǵın tańlaw haqqında daǵazalar járiyalanǵan.
2024-jıl 4-sentyabr sánesinde ulıwma bilim beriw mektepleri jámi 42 lotlarǵa ajıratılıp, Etender.uzex.uz elektron arnawlı platformasına tańlaw (tender) ótkeriw ushın jaylastırılǵan.
Bunda bir bala ushın jumsalatuǵın qárejetler Ózbekstan Respublikası Qarjı ministrligi menen kelisilgen halda Ózbekstan Respublikası Mektepke shekemgi hám mektep bilimlendiriwi ministrligi tárepinen tastıyıqlap berilgen.
Keytering xızmetin kórsetiwge talaban isbilermenlik subektleri 5 jumıs kúni múddet ishinde Etender.uzex.uz elektron arnawlı platforması arqalı tańlawǵa katnasıp, Ózbekstan Respublikası Xalıq bilimlendiriw ministrligi tárepinen tastıyıqlanǵan texnikalıq talapları boyınsha «Satıp alıw (xarid) komissiyası» tárepinen tańlap alınǵan.
Jámiyetshilik toparı tárepinen Nókis qalalıq, Kegeyli, Shımbay hám Qaraózek rayonlıq Mektepke shekemgi hám mektep bilimlendiriwi bólimine qaraslı ulıwma bilim beriw mekteplerinde úyreniw jumısları alıp barıldı.
Búgingi kúnde 19 keytering shólkemleri tárepinen ulıwma bilim beriw mekteplerindegi baslawısh klass oqıwshılarına Ózbekstan Respublikası Sanitariyalıq-epidemiologiyalıq tınıshlıq hám jámiyet salamatlıǵı basqarması hám Mektepke shekemgi hám mektep bilimlendiriwi ministrligi tárepinen tastıyıqlanǵan taǵamnama (máwsimlik azıq-awqat ónimleri) tiykarında azıq-awqat ónimleri menen támiyinlep kelmekte.
Mekteplerde tiykarınan Keytering xızmetin kórsetiwshi isbilermenlik subektleri jeńimpaz, dep tabılıp shártnamalar dúzilgen.
Usı keytering xızmetin kórsetiwshi subektler tárepinen tastıyıqlanǵan taǵamnama (máwsimlik azıq-awqat ónimleri) tiykarında azıq-awqat ónimleri jetkerip berilmekte. Klass xanalarına 7-8 litr átirapında suwdı elektr energiyası arqalı jılıtıp beriwshi úskeneler qoyılǵan bolsa, ayırım mekteplerde keytering xızmetin kórsetiwshi isbilermenlik subekti tárepinen oqıwshılarǵa mektep basshılarınıń usınısı menen chay demlep berilmekte.
Sonday-aq, ayırım mekteplerde mektep komissiyası tárepinen kárxana tárepinen jetkerilip berilgen azıq-awqat ónimleriniń sapasına itibar qaratpastan qabıl etken jaǵdayları anıqlanıp, sapasız ónimlerdi qaytarıw sharaların kóriw, sonday-aq, úyreniw jumısları barısında sın pikirler bildirilgen kemshiliklerdi saplastırıw boyınsha máseleler dodalanıp, kórsetpeler berildi.
Májiliste belgilengen máseleler deputatlar tárepinen keń túrde dodalandı, aytıp ótilgen kemshiliklerden kelip shıǵıp, baslawısh klass oqıwshıların biypul awqat menen támiyinlew jumısları boyınsha pikir-usınıslar bildirildi hám tiyisli qarar qabıl etildi.

Qaraqalpaqstan xabar agentligi.