Ózbekstan Respublikası Sport ministri Adham Ikramov basshılıǵındaǵı jumısshı topar aǵzaları Prezidentimiz tárepinen belgilep berilgen wazıypalardıń orınlanıwın támiyinlew, orınlarda ǵalaba hám professional sporttı rawajlandırıw boyınsha jumıslardıń barısı menen tanısıw maqsetinde, Qaraqalpaqstanǵa keldi.

Jumısshı topar aǵzaları dáslep Nókis Olimpiya hám paralimpiya sport túrlerine tayarlaw orayında bolıp, bul jerde sportshılardıń shınıǵıwı hám olar ushın jaratılǵan sharayatlar menen tanısıp, Sport ministri tárepinen oqıw ornındaǵı sharayatlardı ele de jaqsılaw, sportshı-oqıwshılarǵa keń imkaniyatlar jaratıw boyınsha juwapkerlerge kórsetpeler berildi.
Bunnan soń Sport ministri Adham Ikramov Qaraqalpaqstan Respublikası Ministrler Keńesinde videoselektor májilisin ótkerdi.
Májiliske Qaraqalpaqstan Respublikası Joqarǵı Keńesiniń Baslıǵı Amanbay Orınbaev, Qaraqalpaqstan Respublikası Ministrler Keńesiniń Baslıǵı Farhod Еrmanov, tiyisli ministrlik hám shólkemlerdiń basshıları, barlıq sport federaciyaları hám sport mektepleriniń juwapker wákilleri qatnastı.
Májiliste Prezidentimiz Shavkat Mirziyoevtiń basshılıǵında Olimpiada hám Paralimpiya háreketi, qánigelestirilgen hám ǵalabalıq sporttı jańa basqıshqa alıp shıǵıw hám xalıqtıń fizikalıq belsendiligin arttırıw ilajları boyınsha 13-fevral kúni ótkerilgen videoselektorda berilgen wazıypalardıń orınlanıwın támiyinlew boyınsha áhmiyetli máseleler dodalandı. Atap aytqanda, Qaraqalpaqstan Respublikasınıń barlıq qala hám rayonlarında sporttı rawajlandırıw, sport federaciyalari hám sport mektepleri aldında turǵan áhmiyetli máseleler, usı jılǵı «Bes baslama olimpiadası» jarıslarında hám «Fizikalıq tayarlıq dárejesi» sport sınaqların shólkemleskenlik ótkeriw, ulıwma orta bilim beriw mekteplerinde dene tárbiyası pániniń ótiliwin túp-tiykarınan jetilistiriw hám sport tarawın sanlastırıw boyınsha ámelge asırılıp atırǵan jumıslar dodalandı.
Májiliste bul baǵdardaǵı jumıslardı belgilengen múddetlerde ámelge asırıw boyınsha juwapkerlerge anıq wazıypalar belgilep berildi.

Qaraqalpaqstan xabar agentligi