Qaraqalpaqstan Respublikası Básekilikti rawajlandırıw hám tutınıwshılardıń huqıqların qorǵaw komiteti tárepinen 2024-jıl dawamında joqarı likvidli hám monopol túrdegi ónimlerdi birja sawdaları arqalı realizaciyalawda tómendegi xojalıq júrgiziwshi subektler tárepinen manipulyaciya háreketlerin islegenlik jaǵdayları anıqlanǵan.

Yaǵnıy, olar grafiklerdi orınlamaw hám kúnlik belgilengen kólemlerde ónimlerdi birja sawdalarına qoymaw háreketlerin islegen.
– Sonıń ishinde, “Oltin tola shabbaz”, “Turan aq altin” óndirislik kooperaciyası, “Taxiatosh don mahsulotlari” AJ óndirislik kooperaciyası, “Bo`ston cluster”, “Midasiatex”, “No`kis agro cluster”, “Turon-xojeli” JShJ, “Shimbay may invest” SK, “Amudaryotex” JShJ SK kárxanaların atap ótiwimizge boladı,-deydi komitet bas qánigesi I.Dálibaev.
Joqarıda anıqlanǵan jaǵdaylardan kelip shıǵıp, komitettiń arnawlı komissiyası tárepinen “Básekilik haqqında”ǵı nızamnıń
29-statyası hám Ministrler Kabinetiniń arnawlı qararı menen tastıyıqlanǵan reje talaplarınıń buzılıw belgileri menen kárxanalarǵa qarata is qozǵatılıp, nátiyjesi boyınsha belgilengen tártipte finanslıq járiymalar qollanıw haqqında qararlar qabıl etildi.
Sonday-aq, nızam buzılıw jaǵdayların saplastırıw hám keleshekte jol qoymaw haqqında orınlanıwı májbúriy bolǵan kórsetpeler berildi.

Qaraqalpaqstan xabar agentligi