«The Telegraph» basılımınıń maǵlıwmatına qaraǵanda, bas rezidenciyası Volfsburg qalasında jaylasqan dúnyanıń jetekshi avtomobil hám kommerciyalıq transport quralların islep shıǵarıwshılardan biri – «Volkswagen» Evropanıń qayta qurallanıw háreketi sheńberinde Bundesver ushın áskeriy úskeneler jaratıw imkaniyatı úyreniletuǵının málim etti.

– Kompaniya házirshe itimallı birge islesiwshilerden usınıs almaǵan bolsa da, tiyisli ideyanı dodalawǵa tayar ekenin bildirgen, – delinedi jergilikli telekanal xabarında. – Bul baslama avtomobil eksportı 50 procent qısqarǵanı sebepli kompaniyaǵa qaraslı zavodlarda júzege kelgen bos óndirislik quwatlıqlardan ónimli paydalanıw maqsetinde alǵa qoyılmaqta.
Evropadaǵı eń iri avtomobil islep shıǵaratuǵın bul kárxana óz brendi, biznes baǵdarı hám qarjılay xızmet túrleri menen dúnya bazarında júdá joqarı statusqa iye ekenligin atap ótiw kerek. Kompaniya Evropanıń 17 mámleketi, Arqa hám Qubla Amerika, Aziya hám Afrikadaǵı 10 mámlekette jámi 114 zavodtı basqaradı.

Qaraqalpaqstan xabar agentligi