Hár qanday ideya bárinen burın sanamızda qáliplesedi. Ideyanıń joybarǵa aylanıwı ushın biraz miynet etiwge, qıyınshılıqlarǵa tóziwge tuwra keledi. Joybarlardı nátiyjeli basqarıw ushın bolsa innovaciya, zamanagóy qatnas jasaw talap etiledi.

Respublikalıq Ruwxıylıq hám aǵartıwshılıq orayı xızmetkerleri ushın Kavkaz hám Oraylıq Aziya boyınsha biznes akademiyası trenerleriniń qatnasıwında joybarlardı basqarıwǵa baylanıslı oqıw-treningler bolıp ótpekte.
Seminarda «Ernst & Young» biznes akademiyası treneri Saken Saduakasov basshılıǵındaǵı jámáát dóretiwshilik joybarlar menen birgelikte audit, konsalting, huqıq hám strategiyalar boyınsha óz bilim hám kónlikpelerin tıńlawshılarǵa jetkermekte.
Bayanatlar hár qıylı hám qızıq ekeni menen áhmiyetli. Trenerdiń aytıwınsha, hár qanday shólkemde belgili bir joybardı basqarıw arqalı joqarı nátiyjelilikke erisiw múmkin. Sonıń menen birge, jáhán ámeliyatında da buǵan mısallar kóp. Áhmiyetlisi, eń paydalı hám mápdarlı qatnas jasawdı tańlay alıwı zárúr.
Búgin Respublikalıq Ruwxıylıq hám aǵartıwshılıq orayı iri joybarlar platformasına aylanıp atırǵanın atap ótiw kerek. Bul process hár bir qánigeden zamanagóy bilimlerdi tıyanaqlı iyelewi, jumısqa ózine tán tárizde qatnas jasawdı talap etetuǵını tábiyǵıy jaǵday. Sol jaǵınan bul seminardıń áhmiyeti úlken bolmaqta.
Trening qatnasıwshıları joybarlar menen islesiwdi, olardı basqarıw, ámelge asırıw, waqıttı qadaǵalaw, kútilip atırǵan qáwipti minimallastırıw sıyaqlı ilimiy-ámeliy bilim hám kónlikpelerdi ózlestirmekte.
Treningte joybardı ámelge asırıw procesi, bul basqıshta anıq maqsetlerdi gózlew, tiykarǵı talap hám ideyalar, ulıwma, tema menen baylanıslı barlıq tárepler haqqında hár tárepleme sóz boldı.
Tórt kún dawam etetuǵın trening juwmaǵında qatnasıwshılar ózlestirgen bilimleri tiykarında test tapsıradı hám onnan tabıslı ótkenlerge sertifikatlar beriledi.

Nazokat Usmonova,
ÓzAnıń xabarshısı