«IRNA news» xabarına qaraǵanda, Rossiya Federaciyası Hawa hújiminen qorǵanıw kúshleri júzlegen dronlardı joq etken. Bul Moskva 2022-jılı arnawlı áskeriy ámeliyat baslaǵannan berli Ukraina tárepinen uyımlastırılǵan eń iri transshegaralıq hújim ekeni aytılmaqta.

Rossiya Qorǵanıw ministrligi bir kúnde jámi 337 ushıwshısız qural urıp túsirilgenin málim etti. Usı tárizde Moskva qalası hám 10 wálayat, sonıń ishinde Ukraina menen shegaralas Belgorod, Bryansk, Voronejde hújim qaytarılǵan.
Tiykarǵı nıshan – Kursk hám Moskvaǵa 200 den aslam samolyot ushırılǵan. Paytaxt meri Sergey Sobyanin paytaxt tárepke 70 ten aslam dron ushqanın tastıyıqladı.
Moskva wálayatı gubernatorı Andrey Vorobyov hújim aqıbetinde bir adam qaytıs bolǵanı, úsh adam jaraqatlanǵanı, sonday-aq, bir neshe úyge zıyan jetkeni, avtomobil turıw ornında bir neshe mashina janıp ketkeni haqqında ayttı.
Altı aeroport, sonıń ishinde, Domodedovo, Vnukovo, Shermetevo hám Jukov, paytaxttan sırttaǵı Yaroslav hám Tómengi Novgorod wálayatları hawa portları qáwipsizlik kózqarasınan jabıldı.
Ukraina delegaciyası Saudiya Arabstanında Rossiya menen urıstı toqtatıw boyınsha joqarı dárejeli amerikalı diplomat penen ushıraspaqshı bolǵan bir payıtta jasalǵan hújim boyınsha Kiev rásmiyleri hesh qanday túsindiriw bermedi.

Qaraqalpaqstan xabar agentligi