Prezidentimiz Shavkat Mirziyoevtiń Franciyaǵa ámelge asırıp atırǵan mámleketlik saparı sheńberinde eki mámleket rásmiyleri hám isbilermen toparları arasında biznes-forum ótkerildi. Onda «Ózeltexsanaat» assocaciyasınıń baslıǵı Mirziyod Yunusov qatnasıp, Franciyanıń «Alstom» kompaniyası Batıs hám Oraylıq Aziya boyınsha basqarıwshı direktorı Jerom Boye menen sóylesiwler alıp bardı.
Ushırasıw dawamında Ózbekstan elektrotexnika sanaatınıń jedel rawajlanıwı, tarawdaǵı qolaylı investiciyalıq ortalıq hám xalıqaralıq birge islesiw perspektivaları dodalandı.

Mirziyod Yunusov «Alstom» kompaniyasına Ózbekstandaǵı imkaniyatlardan nátiyjeli paydalanıw, perspektivalı birgeliktegi joybarlardı ámelge asırıw hám zamanagóy texnologiyalardı engiziw boyınsha usınıslar bildirdi.
Atap ótilgenindey, «Alstom» – temir jol transportı hám elektr háreketleniw sistemaları tarawında dúnyadaǵı jetekshi kompaniyalardan biri bolıp esaplanadı. Ol innovaciyalıq lokomotivler, elektrovozlar hám transport texnologiyaların islep shıǵıw hám ámeliyatqa engiziw menen shuǵıllanadı.
Sóylesiwler nátiyjesinde eki tárepleme birge islesiwdi jáne de bekkemlew, jańa investiciyalıq joybarlardı iske qosıw hám Ózbekstan elektrotexnika sanaatınıń turaqlı rawajlanıwına járdemlesiwge kelisip alındı.

N.Ziyodullaeva tayarladı, ÓzA