Qaraqalpaqstan Respublikası Joqarǵı Keńesiniń deputatı Axmed Reymov ózi saylanǵan aymaqtaǵı “Aq otaw”, “Tuńǵısh qonıs” hám “Gúzar” mákan puqaralar jıyınları turǵınları menen ushırasıw ótkerdi. Bul ushırasıw máhállelerde jasaytuǵın puqaralar menen tikkeley sóylesiw, olardıń áhmiyetli mashqalaların tıńlaw hám tiyisli máselelerdi sheshiw boyınsha pikir alısıw maqsetinde shólkemlestirildi.

Ushırasıw dawamında deputat máhálle turǵınları menen sáwbetlesip, olardın múrájatların tıńladı. Puqaralar tárepinen aymaqtaǵı hár qıylı sociallıq-ekonomikalıq máseleler, sonıń ishinde, bántlik, medicina sıyaqlı máseleler kóterildi. Deputat puqaralar tárepinen bildirilgen hár bir múrájattı dıqqat penen tıńlap, bar mashqalalardı basqıshpa-basqısh sheshiw boyınsha tiyisli mámleketlik uyımlar hám juwapker shólkemler menen birgelikte jumıs alıp baratuǵının atap ótti.
Sonday-aq, deputat aymaqtıń sociallıq-ekonomikalıq rawajlanıwı, xalıqtıń abadanlıǵın arttırıw baǵdarında alıp barılıp atırǵan reformalar haqqında túsinik berdi. Sonıń menen birge, mámleketimiz tárepinen xalıqtıń sociallıq qorǵawǵa mútáj qatlamlarına kórsetilip atırǵan járdemler haqqında da sóz etti.
Xalıq tárepinen bildirilgen usınıs hám múrájatler tiykarında tiyisli ilajlar belgilendi hám keleshekte bunday ushırasıwlar turaqlı ótkeriletuǵını atap ótildi. Ilaj sońında deputat tárepinen máhálledegi kem támiyinlengen, baǵıwshısın joǵaltqan hám mayıplıǵı bolǵan puqaralarǵa azıq-awqat ónimleri tarqatıldı.

Qaraqalpaqstan xabar agentligi