2026-jılı áyyemgi hám hámiyshe náwqıran Samarqand qalasında shaxmat boyınsha 46-Pútkil jer júzilik shaxmat olimpiadası oyınları shólkemlestiriledi.

Hár eki jılda bir márte dúnyanıń 200 ge shamalas eń kúshli shaxmat komandalarınıń qatnasıwında ótetuǵın bul abıraylı jarıstı joqarı dárejede shólkemlestiriw maqsetinde mámleketimiz basshısınıń «2026-jıl Ózbekstanda bolıp ótetuǵın 46-Pútkil jer júzilik shaxmat olimpiadasına kompleksli tayarlıq kóriw hám shaxmattı ǵalaba háreketke aylandırıwǵa baylanıslı ilajlar haqqında»ǵı qararı qabıl etilgen.
Sport ministrligi Xalıqaralıq shaxmat federaciyası (FIDE) prezidenti Arkadiy Dvorkovich, Ózbekstan Respublikası sport ministri Adham Ikramov, Jaslar isleri agentligi direktorı Alisher Saydullaev, Ózbekstan shaxmat federaciyası baslıǵınıń orınbasarı Komil Sindorov jáne tiyisli ministrlik hám uyımlardıń juwapker xızmetkerleriniń qatnasıwında 46-Pútkil jer júzilik shaxmat olimpiadasına kompleksli tayarlıq kóriw boyınsha Shólkemlestiriw komitetiniń májilisi ótkerildi. Onda usı abıraylı olimpiadanı joqarı dárejede ótkeriw boyınsha ámelge asırılıp atırǵan jumıslar atap aytqanda, tiyisli ministrlikler menen uyımlardıń óz-ara birge islesiwdegi jumısı dodalandı.
Xalıqaralıq shaxmat federaciyası (FIDE) prezidenti Arkadiy Dvorkovich 46-Pútkil jer júzilik shaxmat olimpiadasınıń Ózbekstanda ótkeriliwi úlken áhmiyetke iye ekenin atap ótti. Mámleketimiz jas shaxmatshılarınıń xalıqaralıq masshtabta erisip atırǵan nátiyjelerin atap ótti.
Óz gezeginde, sport ministri A.Ikramov ótken qısqa waqıtta shaxmat olimpiadasına tayarlıq kóriw boyınsha «jol kartası» islep shıǵılǵanı, hár bir baǵdar boyınsha juwapkerlerge anıq wazıypalar júklengenine toqtap ótti.
Shaxmat olimpiadasın ótkeriw boyınsha qabıl etilgen qarardıń orınlanıwı haqqında tiyisli shólkem qáneigeleriniń atap aytqanda, májiliske onlayn tárizde qatnasqan Samarqand wálayatı hákimligi wákilleriniń, Ózbekstan shaxmat federaciyası qánigeleriniń esabatları tıńlandı.

T.Rwziev, ÓzAnıń xabarshısı