Prezidentimizdiń baslaması menen Ferǵana wálayatı hákimligi Bozataw rayonına qáwender sıpatında biriktirilgen edi. Usı ótken dáwir ishinde Bozataw rayonında ferǵanalılırdıń járdeminde kóplegen unamlı joybarlar ámelge asırılıp, búgingi kúnde bul obyektler xalıq iygiligi ushın xızmet etpekte.

Ferǵana wálayatı hákimi Xayrulla Bozarovtıń basshılıǵındaǵı delegaciya aǵzaları Qaraqalpaqstan Respublikası Ministrler Keńesiniń Baslıǵı Farhad Еrmanov penen birgelikte 2024-jılı ámelge asırılǵan jumıslar menen tanısıw hám jańa joybarlardı ámelge asırıw maqsetinde Bozataw rayonına bardı.
Dáslep miymanlar Qusxanataw awıl puqaralar jıyını aymaǵında Ferǵana wálayatı hákimligi qarjıları esabınan kapital rekonstrukciya jumısları júrgizilgen 9-sanlı mektepke shekemgi bilimlendiriw shólkemi hám 5-sanlı ulıwma orta bilim beriw mektebinde boldı.
Bul jerde miymanlar bilimlendiriw shólkemleriniń jumısları hám olarda jaratılǵan sharayatlar menen tanısıp, usı jerde islewshi pedagog-xızmetkerler hám olarda tárbiyalanıp atırǵan awıl balaları menen sáwbetlesti.
-Mektebimizde burın sport zalı bolmaǵanlıqtan, oqıwshılarımızdıń sport penen shuǵıllanıwı ushın múmkinshilikler joq edi,-deydi 5-sanlı ulıwma orta bilim beriw mektebiniń direktorı Sansızbay Seytmuratov.-Ferǵana wálayatı hákimliginiń qáwenderligi esabınan 2024-jılı 12×24 kóleminde zamanagóy sport zal qurıp berildi hám házirgi waqıtları oqıwshılarımız ushın bul jerde barlıq qolaylı sharayatlar jaratılıp berildi. Bunıń ushın húrmetli Prezidentimizge, Ferǵana wálayatı hákimligi hám respublika hám rayonımız basshılarına úlken raxmet aytamız. Aldaǵı waqıtları oqıwshılarımız ózlerine jaratılǵan bunday keń imkaniyattan nátiyjeli paydalanıp, respublikalıq pán olimpiadaları, hár qıylı tańlaw hám sport jarısılarında jaqsı kórsetkishlerdi qolǵa kirgizedi dep oylayman.
Bunnan soń delegaciya aǵzaları Bozataw rayonındaǵı bir qatar obyektlerde boldı. Atap aytqanda, rayon orayında jaylasqan eski Mádeniyat úyi imaratı, sharwashılıq kompleksi, ıssıxana hám tekstil kárxanasınıń búgingi turmısı menen jaqınnan tanısıp, Ferǵana wálayatı hákimi Xayrulla Bozarov Ferǵana wálayatınan kelgen isbilermenlerge usı obyektlerdi iske túsiriw boyınsha anıq tapsırmalardı belgilep berdi.
Sońınan miymanlar Bozataw posyolkalıq puqaralar jıyınındaǵı 2-sanlı ulıwma orta bilim beriw mektebinde bolıp, Ferǵana wálayatı hákimligi qáwenderligi esabınan jańadan qurılǵan sport zal imaratı menen jaqınnan tanıstı hám Ramazan ayı múnásibeti menen rayon aymaǵında jasawshı sociallıq qollap-quwatlawǵa mútáj shańaraqlarǵa azıq-awqat ónimleri tarqatıldı.
Sonday-aq, delegaciya aǵzaları Ferǵana wálayatı hákimligi tárepinen shólkemlestirilgen júzimzar hám Bozataw rayonı orayında qurılısı rejelestirilgen Nuraniylar mákanı, atalar shayxanası, Bozataw tariyxı muzeyi, mádeniyat orayı ushın ajıratılǵan jer orınlardı kózden ótkerdi.
Bunnan soń Ferǵana wálayatı hákimi Xayrulla Bozarov, Qaraqalpaqstan Respublikası Ministrler Keńesiniń Baslıǵı F.Еrmanov penen birgelikte Bozataw rayonında «Jasıl mákan» ulıwma milliy joybarı sheńberinde báhárgi nál egiw ushın tayarlanǵan jer maydanına terek nállerin egiw ilajına qatnastı.

Adilbay Orazov,
Qaraqalpaqstan xabar agentligi sholıwshısı