BMShta Xalıqaralıq hayal-qızlar kúni múnásibeti menen dúnyadaǵı hayal-qızlardıń búgingi jaǵdayı haqqında bayanat tayarlandı. Atap ótiliwinshe, keyingi 30 jıl ishinde dúnyada hayal-qızlardıń huqıqların keńeytiwge qaratılǵan 1,5 mıńnan aslam reformalar ótkerilgen.

Solay bolsa da, házirde hayal-qızlar erkeklerge berilgen huqılardıń tek ǵana 64 procentine iye. Parlamentlerdegi hayal-qızlardıń sanı eki esege artqan, biraq bul ele de orınlardıń tek sherek bólegin quraydı. Usı waqıtqa shekem tek ǵana 87 mámleket hayal-qızlar tárepinen basqarılǵan.
Dúnyadaǵı hayal-qızlardıń derlik 10 procenti yamasa 393 millionı oǵada kámbaǵallıqta, 15 procentten aslamı bolsa áskeriy urıslar aymaqlarında jasaydı. Jumıs orınlarındaǵı gender ayırmashılıǵı on jıllar dawamında ózgermey qalmaqta: miynetke jaramlı jastaǵı hayal-qızlardıń 63 procenti jumıs isleydi, erkeklerde bul kórsetkish 92 procentti quraydı.
Esletip ótemiz, keshe Prezident Shavkat Mirziyoev Ózbekstanda basqarıw tarawındaǵı xızmetkerlerdiń 35 procentin (2017-jılı – 20 procenti) hayal-qızlar quraytuǵının atap ótken edi. Sonday-aq, parlament tómengi palatası deputatlarınıń 38 procentin hám Senat aǵzalarınıń 27 procentin hayal-qızlar quraydı.

Qaraqalpaqstan xabar agentligi