Usı kúnlerde Qaraqalpaqstanda bolıp turǵan Ózbekstan Respublikası Suw xojalıǵı ministri Sh.Xamraev rayonlarda suw xojalıǵı tarawında, sonday-aq, “Kámbaǵallıqtan abadanlıqqa qaray” baǵdarlaması sheńberinde ámelge asırılıp atırǵan jumıslar menen tanıspaqta,-dep xabar bermekte Suw xojalıǵı ministrliginiń baspasóz xızmeti.

Ministr Kegeyli rayonında da bolıp, baǵdarlama sheńberindegi jumıslardı úyrendi hám rayon hákimi menen ushırasıp, aldaǵı wazıypalar dodalandı.
Ushırasıwda Kegeyli rayonı hákimi A.Kamalov “Kámbaǵallıqtan abadanlıqqa qaray” baǵdarlaması sheńberinde kanallardı tazalaw jumıslarında belsendilik kórsetip atırǵan ekskavator basqarıwshıların qosımsha qollap-quwatlaw jumısları shólkemlestirilip atırǵanlıǵın atap ótti.
Atap aytqanda, Jalpaq jap awıl puqaralar jıyını aymaǵındaǵı kanaldı qazıwda qatnasıp atırǵan ekskavatorshılarǵa bir-bir qaltadan un, may hám basqa da azıq-awqat ónimleri tapsırıldı.
Suw xojalıǵı ministri Sh.Xamraev Kegeyli rayonı hákimi A.Kamalovtıń ekskavatorshılardı qollap-quwatlaw baǵdarındaǵı bul baslaması basqalarǵa úlgi bolatuǵının, ápiwayı mexanizatorlardıń pidákerlik miynetine itibar tiykarında jumıs ónimdarlıǵın arttırıwǵa qaratılǵan ilajlardan biri ekenin atap ótti.
Sonday-aq, suw xojalıǵı juwapkerlerine xalıqtıń qıytaq jerleriniń suw támiynatın jaqsılawǵa qaratılǵan jumıslardı jedellestiriw boyınsha kórsetpeler berildi.
Maǵlıwmat ushın, Kegeyli rayonında “Kámbaǵallıqtan abadanlıqqa qaray” baǵdarlaması sheńberinde Aqtuba, Kók ózek, Abat, Jalpaq jap hám Kumshúńgil awıl puqaralar jıyınlarındaǵı kanallardı hám ishki jap-salmalardı rekonstrukciyalaw jumısları alıp barılmaqta. Bul ushın 9 ekskavator tartılǵan.

Qaraqalpaqstan xabar agentligi