Ándijan, Namangan, Surxandárya, Nawayı, Buxara wálayatlarında múddetli áskeriy xızmetti ótegen 300 ge shamalas qaraqalpaqstanlı jaslar Watan aldındaǵı muqaddes minnetin orınlap úylerine jarqın júz benen qayttı.

Olar “Nókis” temir jol vokzalında Arqa-Batıs áskeriy okrugi sárkardalıǵı, Qaraqalpaqstan Respublikası Qorǵanıw isleri basqarması, Qurallı Kúshler veteranları, mámleketlik hám jámiyetlik shólkemlerdiń wákilleri hám ata-analarınıń qatnasıwında saltanatlı túrde kútip alındı.
Áskeriy kiyimi boyına jarasıp turǵan azamatlar vagonlardan márdana shıǵar eken, olardı kútip alǵanlar bir jıl burın bul óspirimler búgin ádewir erjetip, kúsh-quwatqa tolǵanın kórip quwanıshqa bólendi. Óz ana jurtınıń tınıshlıǵın, xalqınıń tatıwlıǵın qorǵaw haqıyqıy mártlerdiń isi ekenligi atap ótildi.
Nókis garnizonı áskeriy orkestriniń atqarıwındaǵı áskeriy namalar endi ǵana xızmetten qaytıp kiyatırǵan jigitlerdiń qıyalına armiya qatarlarında ótken quwanıshlı kúnlerdi, turmısqa shınıqtırǵan mashaqatlı demlerdi, iyinles bolıp qatarda turǵan zamanlasların, aqıl-násiyatı menen ustazǵa aylanǵan komandir hám basshılardı jáne bir márte esletti.
– Kózlerinde quwanısh jasları menen balaların bawırına basıp atırǵan ata-analar, ózine júklengen juwapkershilikti orınlap kelgen azamatlardıń baxıtlı júzleri, olardı baqlap turǵan alamannıń quwanıshı átirapqa bayram keypiyatın baǵıshladı,-deydi ilaj qatnasıwshılarınıń biri Qaraqalpaq mámleketlik universitetiniń studenti Á.Baymuratov.
Álbette, ómir mektebin ótegen, dúnyaqarası keńeyip, ózlerine isenim payda bolǵan jigitler óz aldına qoyǵan maqsetlerine erisip, keleshekte elimizdiń tınıshlıǵı, xalqımızdıń abadan turmısı ushın pidayı xızmet etedi, eldiń rawajlanıwına óz úlesin qosatuǵın pidayı insan bolıwǵa háreket etedi. Bul ushın elimizde barlıq imkaniyatlar jaratılǵan.

Qaraqalpaqstan xabar agentligi.