Báhár máwsimi kirip keliwi menen elimizde gózzallıq, jasarıw, jańalanıw bayramı baslanıp, 8-mart xalıqaralıq hayal-qızlar bayramı kewillerge bir álem quwanısh baǵıshlaydı. Analarımız, apa-sińli hám qızlarmız benen kelinlerimizdiń bul ájayıp bayramı elimizde keń túrde belgilenip, olar húrmet-izzet hám itibarǵa ılayıq bolıp kelmekte.

Búgin Nókis qalasındaǵı Aq quw kompleksinde 8-mart – Xalıqaralıq hayal-qızlar kúni múnásibeti menen bayram saltanatı bolıp ótti. Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, jıynalǵanlardı bayram múnásibeti menen qutlıqladı.
Bunnan soń, bir topar hayal-qızlardı sıylıqlaw máresimi ótkerildi. Qaraqalpaqstan Respublikası Joqarǵı Keńesiniń Prezidiumı qararı menen Gulistan Dawletova «Qaraqalpaqstan Respublikası xalıq shayırı», Zulxumor Xodjaniyazova – «Qaraqalpaqstan Respublikasına miyneti sińgen densawlıqtı saqlaw xızmetkeri» húrmetli ataǵı menen sıylıqlandı.
Sonday-aq, elimiz ǵárezsizligin bekkemlew, onıń sociallıq-ekonomikalıq potencialın arttırıwǵa qosqan úlesleri hám jas áwladtı Watanǵa sadıqlıq, ulıwma insaniylıq qádiriyatlar ruwxında tárbiyalawdaǵı xızmetleri ushın bir topar hayal-qızlarǵa «Ardaqlı nuranıy», «Ibratlı hayal», «Watan pidayısı», «Úmit ushqını» kókirek belgileri, Qaraqalpaqstan Respublikası Joqarǵı Keńesiniń «Húrmet jarlıǵı», Ózbekstan Respublikası Shańaraq hám hayal-qızlar komitetiniń «Mwytabar ayol» kókirek belgisi, Ministrler Keńesiniń «Húrmet jarlıǵı» tapsırıldı.
-Mámleketimizde hayal-qızlardı húrmetlew, tarawlarda alıp barıp atırǵan miynetlerin júzege shıǵarıw hám bahalawǵa itibar qaratılıp kelinbekte. Miynet etip atırǵan hesh bir hayal-qız itibardan shette qalıp atırǵan joq. Xalqımız ushın islegen azı kem xızmetlerimdi, dóretiwshilik miynetlerimdi bahalap bayram aldınan húrmetli ataq penen sıylıqlaǵanı ushın quwanıshlıman hám óz minnetlarshılıǵımdı bildiremen. Bul meniń keleshektegi dóretiwshilik jobalarımdı júzege shıǵarıwǵa ayrıqsha yosh-ilham baǵıshlaydı,-deydi Qaraqalpaqstan xalıq shayırı Gúlistan Dawletova

Bayram saltanatı kórkem óner hám mádeniyat xızmetkerleriniń atqarıwındaǵı koncert baǵdarlaması menen dawam etti.

G.Turdıshova, Qaraqalpaqstan xabar agentligi