Moynaq rayonı orayındaǵı payızlı orınlardıń birinde 8-mart – Xalıqaralıq hayal-qızlar kúni bayramına baǵıshlanıp bayram keshesi ótkerildi.

Bayram ilajında rayon hákimi B.Menglibekov hám basqalar shıǵıp sóylep, hayal-qızlardı bayram menen qızǵın qutlıqlap, jaqsı tileklerin bildirdi.
Atap ótilgenindey, hár bir tarawda jumıs alıp barıp atırǵan, shańaraqqa nur baǵıshlaytuǵın hayal-qızlarımızdıń jámiyettegi roli ayırıqsha hám jámiyettiń rawajlanıwı ushın shın kewilden xızmet etip atırǵan usınday hayal-qızlar – eń ullı húrmetke ılayıq. Moynaqshı hayal-qızlar da mehir hám húrmetke eń múnásip insanlar. Olarǵa gúller sawǵa etip, olardı gúller menen qarsı alıw bolsa, ádep-ikramlılıq hám itibardıń tımsalı esaplanadı.
Moynaqshı hayal-qızlar bir waqıtları balıq konservaların dúnyaǵa tanıtqan, házir bolsa jańa ómir ushın gúresip atırǵan pidayılar. Olar barlıq dáwirde de el ushın xızmet etken haqıyqıy qaharmanlar! Olardıń miynetleri múnásip qádirlenip, hayal-qızlar itibarda bolsa, jámiyet hám mámleket rawajlanadı.
Bayram saltanatında tarawlarda belsendilik kórsetip kiyatırǵan bir topar hayal-qızlarǵa rayon hákimligi tárepinen húrmet jarlıqları hám bayram sawǵaları tapsırıldı.
Ilaj kórkem óner sheberleriniń atqarıwındaǵı koncert baǵdarlaması menen dawam etti.

Qaraqalpaqstan xabar agentligi