Shańaraq hám jámiyetimizdiń uyıtqısı, ómirimizdiń gúli hám mazmunı bolǵan hayal-qızlardı qádirlew, olarǵa húrmet-izzet kórsetiw xalqımızdıń ullı qádiriyatlarınan biri bolıp tabıladı.

Ózbekstan mámleketlik denetárbiyası hám sport universiteti Nókis filialında 8-mart — xalıqaralıq hayal-qızlar kúni bayramı múnásibeti menen filial miynet jámáátinde jumıs isleytuǵın hayal-qızlardan ibarat professor-oqıtıwshılar, texnikalıq xızmetkerler hám student-qızlardıń qatnasıwında bayram keshesi bolıp ótti.
Bayram keshesin filial direktorı, professor Bayrambay Erimbetov kiris sóz benen ashtı hám ilaj qatnasıwshıların bayramı menen qızǵın qutlıqlap, hayal-qızlarımızdıń jámiyetimiz turmısında tutqan ornı hám atqarıp atırǵan xızmetin joqarı bahaladı. Sonıń menen birge, elimiz Prezidenti tárepinen hayal-qızlar, sonıń ishinde, joqarı oqıw ornına kiriwdi qálewshi qızlarımızǵa jaratılıp atırǵan keń imkaniyatlar hám múmkinshiliklerge toqtap, bunıń ushın Jurtbasshımızǵa úlken raxmetler ayttı.
Soń filialda jumıs isleytuǵın hayal-qızlarǵa húrmet kórsetilip, olarǵa bayram sawǵaları tapsırıldı.
-2024-jılı psixologiya qánigeligi boyınsha alıp barǵan ilimiy jumısımdı tabıslı qorǵap shıqqan edim,-deydi psixologiya ilimleri boyınsha (PhD) filosofiya doktorı Ulbosın Qalilaeva.-Búgingi bayram ilajında institut basshıları tárepinen sıylıqlandım hám bunıń ushın shólkemlestiriwshilerge úlken raxmet aytaman.
Bayram keshesi filial student-jasları tárepinen tayarlanǵan koncert baǵdarlaması menen dawam etti.

Adilbay Orazov,
Qaraqalpaqstan xabar agentligi sholıwshısı.