«Jaslar – keleshegimiz» fondı Qaraqalpaqstan Respublikası filialı hám Ózbekstan Sawda-sanaat palatası Qaraqalpaqstan Respublikası basqarması tárepinen «Biznes klub» aǵzaları hám isbilermenlikke qızıǵıwshı jaslar ushın Nókis qalasında jumıs alıp barıwshı “VISCONTI” juwapkershiligi sheklengen jámiyetine biznes sayaxatı shólkemlestirildi.

“VISCONTI” JShJ direktorı Miyrigul Kaipova Prezidentimiz tárepinen qabıl etilgen «Kishi biznesti rawajlandırıwdı materiallıq hám institucionallıq qollap-quwatlaw ilajları haqqında»ǵı qararı tiykarında 100 million sum muǵdarında jeńilletilgen kredit alıp, búgingi kúnde nan hám nan ónimlerin islep shıǵarıw jumısların jolǵa qoyǵan.
― Isbilermenligimizdi baslaǵanımızǵa bir jılǵa shamalas waqıt boldı. Házirgi waqıtta kárxanamızda 46 túrdegi nan hám nan ónimleri tayarlanadı. Máhállemizdegi 6 hayal-qızdıń turaqlı bántligin támiyinledik. Jeńilletilgen kredit alıwda, isbilermenlik kónlikpelerine iye bolıwımızda hám biznesimizdi baslawda Sawda-sanaat palatası jaqınnan járdem berip kelmekte. Aldaǵı waqıtlarda kárxanamızdı ele de keńeytip, jeke brendimiz tiykarında islep shıǵarılǵan ónimlerimizdi dúnya bazarlarına tanıtıp, qosımsha jumıs orınların jaratıwdı rejelestirip atırmız,-deydi isbilermen M.Kaipova.
Biznes sayaxat dawamında qatnasıwshı jaslar kárxananıń jumısları menen jaqınnan tanısıp, isbilermenlik baǵdarında baslanǵısh bilimlerge iye bolıp, ózlerin qızıqtırǵan sorawlarǵa juwap aldı.

Qaraqalpaqstan xabar agentligi