Respublikamızdıń barlıq aymaqlarında bolǵanı sıyaqlı, Shımbay rayonında «8-mart – xalıqaralıq hayal-qızlar kúni» bayramı kóterińki keypiyatta belgilenip ótildi.

Rayon hákimligi tárepinen shólkemlestirilgen keshege nuraniy analar, jámiyetlik turmısta belsendilik kórsetip kiyatırǵan hayal-qızlar, mákeme, kárxana hám shólkem wákilleri qatnastı. Keshede rayon hákimi Aybek Tajetdinov hám basqalar ilaj qatnasıwshıların xalıqaralıq hayal-qızlar bayramı menen qutlıqladı. Ilajda sońǵı jılları Prezidentimizdiń arnawlı qararı menen hayal-qızlarǵa jaratılıp atırǵan imkaniyat hám múmkinshiliklerge keń túrde toqtap, bul qolaylıqlardan nátiyjeli paydalanıp atırǵan zamanlaslarımızdıń úlgili islerin húrmet penen tilge aldı. Sonıń ishinde 8-mart-xalıqaralıq hayal-qızlar kúni bayramı múnásibeti menen Shımbay rayonı hákiminiń orınbasarı-shańaraq hám hayal-qızlar bóliminiń baslıǵı Gúlzar Mambetniyazovanı «Dwstlik» ordeni menen sıylıqlaǵanı ushın elimiz basshısına ózleriniń tereń minnetdarshılıqların bildirdi.
Saltanatlı keshede elimizdegi túpkilikli reformalarǵa belsene qatnasıp, Jańa Ózbekstandı qurıw, xalqımızdıń abadanlıǵın arttırıw jolında ayrıqsha baslama hám úlgi kórsetip kiyatırǵan, shańaraqlarda ruwxıy ortalıqtı bekkemlew, perzentlerimizdi Watanǵa súyispenshilik hám sadıqlıq, milliy hám ulıwmainsanıylıq qádiriyatlarǵa húrmet ruwxında tárbiyalawga úlken úles qosıp kiyatırǵan shımbaylı bir qatar úlgili apalarımız benen qarındaslarımızǵa rayon hákimliginiń «Húrmet jarlıǵı» hám estelik sawǵaları tapsırıldı.
Ilaj respublikamızǵa belgili kórkem óner sheberleri hám mádeniyat bólimi xızmetkerleri tárepinen tayarlanǵan konńert baǵdarlaması menen dawam etti.

Adilbay Orazov,
Qaraqalpaqstan xabar agentligi sholıwshısı