Nókis qalasındaǵı Jas tamashagóyler teatrında Yangi Wzbekiston universiteti oqıtıwshısı, professor Alisher Esbosınovich Sanetullaev hám Rossiya Ilimler akademiyasınıń professorı Pavel Aleksandrovich Belovlar qaraqalpaqstanlı mektep oqıwshılarına «Sheberlik saatları»n ótti.

Ilajdı Qaraqalpaqstan Respublikası Mektepke shekemgi hám mektep bilimlendiriwi ministrliginiń bólim baslıǵı M.Asamatdinov ashtı hám ilimpazlar haqqında maǵlıwmatlar berdi.
Bunnan soń rossiyalı professor Pavel Aleksandrovich Belov óziniń ilimiy jumısı hám izertlewleri haqqında bayanat jasap, «Еlektromagnit tolqınlardıń turmısta qollanılıwı» temasında prezentaciya isledi hám bul baǵdardaǵı eń sońǵı izertlewler, innovaciyalar menen tanıstırdı. Atap aytqanda, sımsız quwatlaw úskenesiniń islew principi, onıń zamanagóy turmıstaǵı áhmiyeti hám perspektivaları haqqında oqıwshılarǵa keńnen túsinikler berdi.
Sonday-aq, ilajda professor Alisher Sanetullaev «Yangi Wzbekiston» universitetiniń jumısı, bilimlendiriw baǵdarlamaları hám xalıqaralıq birge islesiw baǵdarları haqqında prezentaciya isledi. Atap aytqanda, ol universitettiń ilimiy-izertlew baǵdarları, studentlerge jaratılǵan qolaylıqlar hám xalıqaralıq kólemdegi birge islesiw joybarlarına ayrıqsha itibar qarattı. Sonıń menen birge, «Yangi Wzbekiston» universitetinde fizika hám injenerlik baǵdarlarında ámelge asırılıp atırǵan innovaciyalıq joybarlar haqqında da maǵlıwmatlar berildi.
Ilajda oqıwshılar tárepinen bayanatshılarǵa sorawlar berilip, olarǵa juwaplar aldı.

Adilbay Orazov,
Qaraqalpaqstan xabar agentligi sholıwshısı.