Ózbekstan Respublikası Bas ministriniń orınbasarı – Еkonomika hám qarjı ministri Jamshid Qwchqorov hám Franciyanıń abıraylı qarjı mákemesi – «SociétéGénérale» bankiniń wákilleri arasında ushırasıw bolıp ótti.

Sóylesiw dawamında eki tárepleme birge islesiw baǵdarları, menshiklestiriw processleri, «jasıl» ekonomikanı rawajlandırıw hám mámleketlik-jeke menshik sheriklik joybarları dodalandı.
Sonday-aq, mámleket qatnasıwındaǵı bankler hám kárxanalardı menshiklestiriw, bahalı qaǵazlar bazarı, evroobligaciyalar shıǵarıw, xalıqaralıq reytingler menen islesiw processlerin jedellestiriw, «Qorshaǵan ortalıqtı qorǵaw hám «jasıl» ekonomika jılı» sheńberinde ekologiyalıq turaqlı joybarlardı rawajlandırıw, energiya nátiyjeliligin arttırıw hám zamanagóy texnologiyalar tiykarında turaqlı ıssılıq sistemasın jaratıw máselelerine itibar qaratıldı.
Onda densawlıqtı saqlaw, bilimlendiriw hám energetika, sonıń ishinde, elektr energiyasın jetkerip beriw tarawındaǵı sheriklik joybarların ámelge asırıw boyınsha da pikir alısıldı.
Ushırasıw sońında tárepler eki mámleket arasındaǵı qarjılay birge islesiwdi jáne de rawajlandırıw hám belgilengen maqsetlerge erisiw ushın ámeliy qádemlerdi birgelikte ámelge asırıwǵa kelisip aldı.

N.Ziyodullaeva tayarladı, ÓzA