Respublikamızda jollardı qurıw hám rekonstrukciyalaw jumısları sheńberinde Qaraózek hám Beruniy rayonları aymaǵınan ótetuǵın A-380 «Ǵuzar-Buxara-Nókis-Beynew» avtomobil jolınıń 673-698 km (25 km) bólegin cement-beton qaplama menen rekonstrukciyalaw joybarı alıp barılmaqta.

-Ózbekstan Respublikası Ministrler Kabinetiniń 2023-jıl 14-dekabrdegi qararına tiykarlanıp Qaraózek hám Beruniy rayonları aymaǵınan ótiwshi A-380 «Ǵuzar-Buxara-Nókis-Beynew» avtomobil jolınıń 673-698 km (25 km) bólegin Aziya rawajlandırıw bankiniń qatnasıwında cement-beton qaplaması menen rekonstrukciyalaw belgilengen edi. Usı qarardıń orınlanıwın támiyinlew maqsetinde 2024-jıl 22-avgust kúni “Dorkomplekstsnab Plus” JShJ (Ózbekstan) hám “New Tech Samarqand” (Ózbekstan) qospa kárxanaları xalıqaralıq tender sawdalarında jeńimpaz dep tabılıp, jumıstı bólip alıp islew shártnamalarına qol qoyıldı. Sonday-aq, joybar konsultantları: “Yooshin Engineering Corporation,” “ISAN Corporation” (Qubla Koreya) qospa kárxanası, subkonsultantlar “Intelligent Solution LLC” hám “GEO Engineering LLC” (Gruziya) kompaniyaları menen shártnamalarǵa qol qoyıldı. Joybardıń ulıwmalıq bahası 60,9 million dollardı quraydı.
Qurılıs jumısları 2024-jıldıń oktyabr ayında baslanıp, áyne payıtta dawam etpekte,-deydi Qaraqalpaqstan Respublikası avtomobil jolları bas basqarması baspasóz xatkeri D. Jumamuratov.

Qaraqalpaqstan xabar agentligi